Դիլիջանի ամֆիթատրոնում անցկացվեց «Մե՜ծ տոնավաճառ Դիլիջանում» միջոցառումը։
Ամերիկայի կառավարության ֆինանսավորմամբ, «Փրոջեքթ Հարմոնի» ՀԿ կազմակերպմամբ և «Իջևանի գրադարան և դասընթացների կենտրոնի» գործընկերությամբ կազմակերպված միջոցառման ընթացքում ամֆիթատրոնում ներկայացվեցին տեղական արտադրողների կողմից պատրաստված ապրանքներ, հանդիսավոր միջոցառում, վարպետաց դասեր և ներկայացում երեխաների համար, իսկ միջոցառման ավարտին տեղի ունեցավ ներկայացված տաղավարների մրցույթ։
Ընդհանուր ծրագրի ղեկավար Արփի Թամրազյանը մեզ հետ զրույցում նշեց, որ ծրագիրը 5 հաղթող նախագծերից մեկն էր, որի հիմնական նպատակը Դիլիջանում և հարակից բնակավայրերում ապրող բնակիչների համար աշխատանքի և ժամանցի մեկօրյա ապահովումն էր։
Կարդացեք նաև
«Մեր առջև խնդիր էինք դրել՝ ամեն ինչ պատշաճ ու բավարար կազմակերպված իրականացնելու։ Սկզբում ունեցանք հայտադիմումների փուլ, որին մեծ թվով բնակիչներ էին դիմել, սակայն մենք ընտրեցինք միայն այն հայտատուներին, ովքեր համապատասխանում էին, այսպես ասած, մեր չափորոշիչներին։ Ունեցանք նաև աշխատարան «Արտադրանքի բրենդինգ» թեմայով։ Երրորդ և վերջնական փուլը մեր տոնավաճառ-միջոցառումն էր։ Քանի որ առաջին անգամ էի ինքս նման մասշտաբի աշխատանք իրականացնում, սկզբում այնքան էլ լավ չէի պատկերացնում աշխատանքի ծավալն ու դժվարությունները, միայն այսօր, երբ արդեն շատ բան էր կախված ինձնից, հասկացա, թե որքան ծանր աշխատանք եմ վերցրել ուսերիս։ Ունեցանք հիմնական տոնավաճառի մաս, որը ամբողջ ընթացքում ուղեկցվում էր երաժշտությամբ, այնուհետև մանկական ներկայացում փոքրիկների համար, իսկ ամենավերջում ընտրեցինք մեր տոնավաճառի ամենագեղեցիկ, ամենանորարար և ամենաակտիվ տաղավարներին»,- նշեց Թամրազյանը։
Նրա խոսքով՝ չնայած հանդիպած դժվարություններին՝ օրը հաջողված ու տոնական էր տեղացիների ու մասնակիցների համար.
«Վերջին ժամանակներում մարդկանց կենցաղը այնքան է բարդացել, որ նման միջոցառումների անցկացումը անհրաժեշտություն է դարձել. հույս ունեմ, որ կարողացանք նաև այս առումով տրամադրություն փոխել»։
Սաթենիկ ՀՈՎՍԵՓՅԱՆ
