Լեւոն Արոնյանը կիրակի գիշեր հեռանում է Հայաստանից: Նա անդամագրվելու է ԱՄՆ-ի շախմատի ֆեդերացիային եւ այսուհետեւ հանդես է գալու այդ երկրի դրոշի ներքո:
Այս մասին հայկական շախմատի լեգենդը հայտարարեց իր եւ Գաբրիել Սարգսյանի շախմատի գրոսմայստերական հեղինակային ուսումնական կենտրոնի սաների հետ հանդիպման ժամանակ: «Երբեք չեմ ցանկացել այլ երկրի դրոշի ներքո հանդես գալ: Մեր դրոշից ավելի քաղցր դրոշ գոյություն չունի ինձ համար: Բայց, ցավոք, դա լինելու է, բայց՝ ոչ իմ ցանկությամբ»,-ասաց Լեւոն Արոնյանը:
2018 թվականից ի վեր լեգենդար շախմատիստի եւ հայաստանյան պատկան մարմինների ջրերը նույն առվով չէին հոսում ու հայտնի էր, որ Լեւոն Արոնյանը, ամենայն հավանականությամբ, ստիպված է լինելու հակառակ իր կամքի հեռանալ հայրենիքից: Սակայն Արոնյանը վստահեցրեց, որ հաճախակի է գալու Հայաստան, եղած բոլոր հնարավորություններով անգամ հազարավոր կիլոմետրեր հեռվից հետեւելու է հայ շախմատիստների մրցելույթներին, անհրաժեշտության դեպքում խորհուրդներով աջակցելու է պատանիներին ու երիտասարդներին:
Արոնյանը նաև ընդգծեց, որ իրենց՝ շախմատիստներին, ուրիշ ոչինչ պետք չէ, բացի մարդկային վերաբերմունքից:
Կարդացեք նաև
Aravot.am-ը Արոնյանից հետաքրքրվեց, թե աշխարհի գավաթի առաջիկա խաղարկությունում ինքը դեռ Հայաստանի դրո՞շն է ներկայացնելու, ինչին գրոսմայստերը տխուր պատասխանեց. «Դեռ չգիտեմ, բայց երեւի՝ ոչ»:
Աշոտ ՀԱԿՈԲՅԱՆ
