«ՏԻՄ-երի հետ կապված ակնհայտ տեղի են ունենում ապօրինություններ, նկատի ունեմ և՛ խոշորացման գործընթացը, և՛ բազմաթիվ ընթացակարգեր, որ խախտվել են»,-լրագրողների հետ զրույցում հայտարարեց ՀՀ ԱԺ «Հայաստան» խմբակցության պատգամավոր, ԱԺ փոխնախագահ Իշխան Սաղաթելյանը: Նա խմբակցության պատգամավորների հետ եկել էր Քանաքեռ-Զեյթուն հիվանդանոց՝ տեսակցելու պատգամավոր Արմեն Չարչյանին:
Իշխան Սաղաթելյանն ահազանգեց՝ առաջիկայում սպասվող ՏԻՄ ընտրություններին իրենց հավանական թեկնածուների նկատմամբ իշխանությունը համատարած բռնաճնշումներ է իրականացնում. «Շարունակվում են հետապնդումները համայնքի ղեկավարների նկատմամբ, որպեսզի գործող, հեղինակություն ունեցող համայնքի ղեկավարները հրաժարական տան, որ իրենց թեկնածուներին ժամանակավոր պաշտոնակատար նշանակեն և այդ ուղղությամբ փորձեն ՏԻՄ ընտրություններում հասնել հաջողության: Ակնհայտ է՝ բազմաթիվ գործող քաղաքապետեր, հեղինակություն ունեցող մարդիկ խուսափում են ՔՊ ցուցակով առաջադրվել: Այդ մարդկանց տարբեր մեղադրանքներով մեկուսացնում են, որպեսզի ՏԻՄ ընտրություններում ևս կարողանան հաջողության հասնել: Կան բազմաթիվ դեպքեր. առաջիկայում ավելի մեծ ծավալով կխոսենք»:
Հարցին՝ ՀՅԴ-ն մտադի՞ր է ՏԻՄ ընտրություններում համայնքապետի թեկնածուներ առաջադրել, օրինակ՝ Գորիսում իրենց դաշինքի անդամ «Վերածնվող Հայաստան» կուսակցությունը պաշտպանելու է Առուշ Առուշանյանի թեկնածությունը, Իշխան Սաղաթելյանը պատասխանեց. Գորիսում ՀՅԴ-ն ևս պաշտպանելու է Առուշ Առուշանյանի թեկնածությունը: Տարբեր համայնքներ ունեն տարբեր մոտեցումներ. տեղեր կան դաշինքով, տեղեր՝ առանձին մեր կուսակցությամբ ենք մասնակցելու ՏԻՄ ընտրություններին: Բազմաթիվ համայնքներում Դաշնակցությունը հանդես է գալու առանձին՝ իր համամասնական ցուցակով: Եթե կա մի տեղ, որ դաշինքով կուսակցություններից մեկն է մասնակցում, դա չի նշանակում՝ կան հակասություններ, պարզապես քաղաքական ղեկավարությունը, հաշվի առնելով տեղական կառավարումը, եկել է այդ եզրահանգման»:
Տաթև ՀԱՐՈՒԹՅՈՒՆՅԱՆ
