Գյումրու ավագանու ամենաակտիվ անդամներից մեկը՝ ընդդիմադիր ԳԱԼԱ խմբակցության անդամ, Ժուռնալիստների «Ասպարեզ» ակումբի խորհրդի նախագահ Լևոն Բարսեղյանն այսօր ֆեյսբուքյան գրառմամբ տեղեկացրել էր Գյումրու ՏԻՄ ընտրություններին իր մասնակցության մասին։ Նա հրապարակել էր իրեն տրված տեղեկանքը՝ Տեղական ինքնակառավարման ընտրությունների ժամանակ ՀՀ քաղաքացի հանդիսացող թեկնածուի՝ տվյալ համայնքի բնակչության ռեգիստրում մինչև քվեարկության օրն առնվազն վեց ամիս հաշվառված լինելու մասին։
Օգտատերերից մեկը հետաքրքրվել էր, թե քաղաքապետի՞ թեկնածու է առաջադրվելու, որին ի պատասխան՝ Լևոն Բարսեղյանը հորդորել էր․ «Դիմացեք՝ կուսակցությունները որոշեն, առաջարկել եմ միավորվել, այդ դեպքում՝ այո»։
Մենք պարոն Բարսեղյանին խնդրեցինք մանրամասնել՝ ի՞նչ քաղաքական ուժով է մասնակցելու։ Նա պարզաբանեց հետևյալը․ «Ասեմ այն, ինչ հիմա պարզ է: Մի քանի կուսակցություններ դիմել էին՝ առաջարկելով գլխավորել իրենց ցուցակը: Ես, ինչպես նախորդ տարիներին, առաջարկել եմ դաշինք կազմել, հիմա առավել ևս, որպեսզի չկրկնվի ԱԺ միկրոմոդելն այստեղ: Շուտով կորոշվի, թե որ քաղաքական ուժերն են դաշինքի համաձայնում: Լուր կտարածենք»:
Ի դեպ, նշենք՝ ԳԱԼԱ-ն, որի ավագանու անդամները ամենաակտիվն են ավագանու նիստերում, չի մասնակցելու ՏԻՄ ընտրություններին։ Այս մասին ֆեյսբուքյան գրառմամբ տեղեկացրել է ԳԱԼԱ խմբակցության ավագանու անդամ Արմենուհի Վարդանյանը։
Կարդացեք նաև
«Ի պատասխան գործընկեր լրագրողների հարցադրումներին.
ԳԱԼԱ-ն չի մասնակցի Գյումրիի ՏԻՄ ընտրություններին: ԳԱԼԱ կուսակցության անդամները չեն լինի որեւէ կուսակցության կամ դաշինքի ցուցակում», -գրել է նա։
Նունե ԱՐԵՎՇԱՏՅԱՆ
