Ռեստորաններն ու այլ կազմակերպությունները չեն կարող չենթարկվել կիրառվող սահմանափակումներին, ինչպես, օրինակ, չեն կարող հրաժարվել հարկային պարտավորությունները կատարելուց: Այսօր կառավարության նիստից հետո, լրագրողների հետ ճեպազրույցում, անդրադառնալով կորոնավիրուսային իրավիճակով պայմանավորված սահմանափակումներին՝ ասաց առողջապահության նախարար Անահիտ Ավանեսյանը:
Նրա խոսքով, սահմանված կանոնները պետք է հստակորեն պահպանվեն, եթե չեն պահպանվում, ինչպես այլ իրավակարգավորումների դեպքում, կան պատժամիջոցներ. «Եթե ինչ-որ ռեստորան այսօր հայտարարի, որ այլեւս հարկային պարտավորությունները չի կատարելու, ի՞նչ կպատահի: Պարզ է, որ կլինեն իրավական հետեւանքներ», -ասաց Անահիտ Ավանեսյանը:
«Այս համավարակը ստեղծել է ճնշում, եւ առողջապահական համակարգերի, եւ տնտեսությունների, եւ ազգային անվտանգության առումով շատ լուրջ մարտահրավեր է: Բայց ո՞րն է մեր ճանապարհը: Եթե մենք չենք կիրառում սահմանափակող միջոցառումներ, ապա ի՞նչ իրավիճակի առջեւ ենք մենք կանգնում: Շատ ավելի վատ՝ ե՛ւ առողջապահական, ե՛ւ տնտեսական, ե՛ւ բոլոր առումներով: Այսինքն՝ ճիշտ ժամանակին կիրառված սահմանափակող միջոցառումները մեզ հնարավորություն են տալիս պաշտպանելու առաջին հերթին մարդկանց կյանքն ու առողջությունը, բայց նաեւ տնտեսությունը: Նաեւ նույն ռեստորանները, նույն համերգային եւ այլ գործունեությունը: Որովհետեւ եթե մենք ունենում ենք կառավարելիության շրջանակից դուրս հիվանդացության աստիճան, բոլորս հասկանում ենք, որ խնդիրը արդեն անդրադառնում է բոլորիս վրա», -ասաց նախարարը:
Լուսինե ԲՈՒԴԱՂՅԱՆ
