Դուք խոսում եք բարեփոխված ոստիկանության մասին, իսկ պարեկները մարդուն կյանքից են զրկում. այսօր լրագրողների հետ ճեպազրույցում այս հարցին ի պատասխան՝ Ներքին գործերի նախարար Վահե Ղազարյանն ասաց. «Դուք լավ գիտեք, որ դրա հետ կապված կա քրեական վարույթ եւ կատարվում է նախաքննություն»:
Հարցին՝ սա՞ է բարեփոխումը, կամ բարեփոխումը ա՞յն է, որ Գեւորգ Պետրոսյանի մեքենայի դուռը պարեկը բացի եւ ինչ-որ բաներ ասի՝ նա պատասխանեց. «Սխալ բա՞ն կար պարեկի արարքում: Ի՞նչ կար: Դուք նայել եք չէ՞ այդ բաները»:
Ի՞նչ իրավախախտում էր նա արել, Գեւորգ Պետրոսյանի նկատմամբ քաղաքական հետապնդո՞ւմ է իրականացվում՝ Ղազարյանը պատասխանեց. «Ոստիկանությունը ոչ մի անգամ քաղաքականության մեջ չի խառնվել եւ չի էլ խառնվելու»:
Կարդացեք նաև
Հարցին՝ դուք խոսում էիք մարզային բաժինների ոստիկանների կաշկանդվածությունից, դուք կաշկանդվածություն չունե՞ք, Նիկոլ Փաշինյանի դասարանցին եք, չե՞ք դարձել Նիկոլ Փաշինյանի անվտանգության ապահովողը, քաղաքական գործիք՝ նախարարը պատասխանեց. «Ես դասարանցին չեմ եղել, զուգահեռ դասարանից եմ եղել: Ինչի՞ համար կաշկանդվեմ: Ոչ, կաշկանդված չեմ»:
Aravot.am-ը ոստիկանապետից ճշտեց՝ ճի՞շտ է, որ պարեկ տեսնելիս պետք է անհապաղ դիմել ոստիկանությանը՝ նախարարը ծիծաղեց. «Խի՞, ի՞նչ է եղել, որ, ինչի՞ համար»:
Նա խոստացավ իր պաշտոնավարման 100 օրը լրանալուց հետո հրավիրել լրագրողների եւ բոլոր հարցերին տալ պատասխաններ:
Հռիփսիմե ՋԵԲԵՋՅԱՆ
