«Դեմոկրատիա, օրենք և կարգապահություն» կուսակցության պատգամավորի թեկնածուների համամասնական ցուցակը գլխավորող Վարդան Ղուկասյանը չունի փաստաթղթեր, որոնք հավաստում են, որ նա վերջին 4 տարում հանդիսացել է միայն Հայաստանի քաղաքացի և վերջին 4 տարում մշտապես բնակվել է Հայաստանում։
Այս մասին ՀՀ կենտրոնական ընտրական հանձնաժողովի ապրիլի 30-ին հրավիրած արտահերթ նիստում հայտարարեց ԿԸՀ անդամ Սիլվա Մարկոսյանը։ Հիշեցնենք, որ նիստում հանձնաժողովի անդամները դիտարկեցին առաջադրված կուսակցությունների/դաշինքների ներկայացրած փաթեթներում տեղ գտած անճշտություններն ուղղելու նպատակով քաղաքական ուժերին ժամանակ տալու հարցը։
Ըստ գործող կարգի՝ ներկայացված փաստաթղթերի փաթեթում տեղ գտած անճշտություններն ուղղելու համար տրվում է 48 ժամ։ Վարդան Ղուկասյանի փաստաթղթերի թղթապանակում բացակայում է նաև որպես պատգամավորի թեկնածու գրանցվելու համաձայնության մասին գրավոր դիմումը։ Բացի սրանից, պատգամավորի մի շարք այլ թեկնածուների մոտ ևս բացակայում են խորհրդարանական ընտրություններին մասնակցելու համար անհրաժեշտ տարբեր փաստաթղթեր։
Կուսակցությանը տրվել է 48 ժամ՝ անճշտությունները շտկելու համար։ Գործող կարգի համաձայն՝ կուսակցության ներկայացուցիչները կարող են եռօրյա ժամկետում ԿԸՀ որոշումը բողոքարկել դատարանում։
Կարդացեք նաև
Արմեն ԴԱՎԹՅԱՆ
