Հուլիսի լույս 17-ի գիշերը, գիշերվա ժամը 2-ի սահմաններում Իջեւան քաղաքի բնակիչներից մեկը «Ֆեյսբուք» սոցիալական ցանցով մեզ ուղարկեց դրանից մոտ 2 ժամ առաջ Իջեւանի Աբովյան փողոցի 22-րդ շենքի բակում սպանված, արյան լճակի մեջ շան լուսանկարը: Քաղաքացին խնդրում էր անդրադառնալ այդ խնդրին: Հուլիսի 17-ին զանգահարեցինք Իջեւանի քաղաքապետ Վարդան Ղալումյանին: Նա ասաց, որ իրենք մարզկենտրոնում թափառող շների ոչնչացման գործողության մասին նախօրոք, գործողությունից 3 օր առաջ մարզային «Տավուշ» հեռուստաընկերության եթերում զգուշացնում են Իջեւանի բնակիչներին: Վ. Ղալումյանի խոսքերով՝ թափառող շների ոչնչացումը, համաձայն Իջեւանի քաղաքապետարանի հետ կնքված պայմանագրի, կատարում է ՀՀ որսորդմիության Տավուշի մարզային մասնաճյուղը:
Քաղաքապետն ասաց, որ հուլիսի լույս 17-ի գիշերը Իջեւանում թափառող շների ոչնչացման գործողություն չի կատարվել: Նա հայտնեց, որ հուլիսի 17-ի առավոտյան իրեն զանգահարել է Աբովյան-22 շենքի բնակիչներից մեկը եւ ասել,որ սպանված շան պատկերը կարող է վատ տպավորություն թողնել երեխաների վրա, եւ իր կարգադրությամբ քաղաքային կոմունալ ծառայության մեքենան շենքի բակից տեղափոխել է շան մարմինը: Քաղաքապետի տեղեկություններով՝ սպանված շունը թափառող չի եղել,հիշյալ շենքի եւ թաղամասի բնակիչները պարբերաբար կերակրել են կենդանուն:
Ոսկան ՍԱՐԳՍՅԱՆ
Իջևանցիները շուն չեն սիրում:Ես այնտեղ մի մեծ շան գերեզմանոց ունեմ:Իջևանցին թույնում է,շունը սատկում, ես` թաղում:Վերջը…Ես էլ եմ դրան սպասում: