«Արյունոտ ռուսի սապոգ» եւ «մոլոտովի կոկտեյլ». սրանք այն նվերներն են, որ ՀՀ-ում Ռուսաստանի դեսպանատունն այսօր երեկոյան ստացավ «Ձեռքներդ հեռու Արցախից. արժանապատվության պահանջ-երթ»-ի մասնակիցներից։
«Եթե մեկը փորձի հող հանձնել, մենք իրեն կհանձնենք հողին: Ով փորձի հող հանձնել, այս բոցավառվող հեղուկը կնետենք ոչ միայն այս դեսպանատան, այլեւ բոլոր նրանց վրա, որոնք կփորձեն հող հանձնել»,- մինչ նվերը դեսպանատանը հանձնելն ասաց ակցիայի կազմակերպիչներից Դավիթ Սանասարյանը:
Կարդացեք նաև
Նվերներն արկղի մեջ էին: Ակցիայի մասնակիցները ցանկանում էին արկղը դնել դեսպանատան նամակների արկղի մոտ: Երեւանի փոխոստիկանապետ Վալերի Օսիպյանը հորդորեց արկղը թողնել մայթի մոտ: Տեւական բանակցություններից հետո, կազմակերպիչների մի քանի հոգանոց խումբը`ոստիկանների ուղեկցությամբ, նվերը թողեց դեսպանատան մոտ:
Ոստիկաններն, ի դեպ, լավագույնս պաշտպանում էին դեսպանատան շենքը: Նրանք երեք շարքով պատ էին կազմել` ակցիայի մասնակիցներին թույլ չտալով անցնել դեսպանատան մայթ:
Ակցիայի ավարտին, կազմակերպիչները փորձեցին այրել Հայաստանի, Ադրբեջանի եւ Ռուսաստանի նախագահների լուսանկարները: Ոստիկանները թույլ չտվեցին: Այս առիթով թեթեւ ընդհարումից հետո ակցիայի մասնակիցները հեռացան դեսպանատան մոտից:
Մինչ այդ, ակցիայի մասնակիցները մինի-հանրահավաք անցկացրեցին ՀՀ Արտաքին գործերի նախարարության շենքի առջեւ: Նրանք պահանջեցին, որպեսզի Հայաստանը ճանաչի ԼՂՀ անկախությունը: Ինչպես արդեն տեղեկացրել ենք, ԱԳՆ-ի շենքի մոտ միջադեպ եղավ:
Ռուսաստանաբնակ հայ երիտասարդին դուր չէր եկել Հայաստանցի իր հայրենակիցների ըմբոստությունը: Նրան հատկապես տհաճ էր թվացել «Լավրով ս….» մակագրությամբ պաստառը: Ասում էր`անհարմար է նման պաստառներ կրելը, ակցիային նաեւ երիտասարդ աղջիկներ են մասնակցում:
Ավելի ուշ, Aravot.am-ի հետ զրույցում Երեւանի փոխոստիկանապետ Վալերի Օսիպյանն ասաց, որ երիտասարդին ոստիկանները բացատրել են, որ իր ըմբոստությունն ավելի կսրի լարվածությունը: Նա, ըստ Օսիպյանի, ըմբռնումով է մոտեցել: Սակայն, առավել ապահով լինելու համար, երիտասարդին հեռանալիս երկու ոստիկան են ուղեկցել:
Բողոքի ակցիան մեկնարկեց Ազատության հրապարակից: Նախ` հնչեց 1988-ի շեփորի երաժշտությունը: Դավիթ Սանասարյանն ասաց, որ այն «ազդանշան, սիմվոլ» ունի`փաստելով, որ երկու տասնամյակ անց նույն հարթակում, նույն թեզերն են հնչում ու դա մեր «ապօրինի իշխանության» շնորհիվ է:
Ապա, ակցիայի մասնակիցները երթով շարժվեցին դեպի ԱԳՆ-ի շենք, եւ ՀՀ-ում ՌԴ դեսպանատուն: Ցուցարարները վանկարկում էին «Ազատ, անկախ Հայաստան», «Որոշողը մենք ենք», «Ոչ մի թիզ հող թշնամուն» եւ այլն: Տարատեսակ մակագրություններով պաստառների հետ կրում էին նաեւ քառօրյա պատերազմի ժամանակ զոհված զինծառայողների լուսանկարներ:
ԱԳՆ-ի շենքի մոտ հնչեցին հետեւյալ պահանջները.
- Հայաստանը եւ Արցախը Ադրբեջանին որեւէ թիզ հող չունեն հանձնելու, ընդհակառակը՝ վերջինիս սաստելու, սեփական ժողովրդի անվտանգությունը երաշխավորելու համար անվտանգության ավելի ընդարձակ գոտի ստեղծելու կենսական անհրաժեշտություն ունեն,
- Արցախի խաղաղության եւ անվտանգության միակ ապահովող եղել է եւ պիտի մնա մեր՝ Արցախի զինվորը, իսկ միջազգային խաղաղապահներ պետք է տեղակայվեն Ադրբեջանում՝ բնիկ ժողովուրդներին՝ թալիշներին, լեզգիներին, ավարներին եւ այլոց պաշտպանելու համար,
- Ապահովել Ադրբեջանից փախստական դարձած հայերի, այդ թվում՝ շահումյանցիների անվտանգ շուտափույթ, կամավոր ու անվտանգ վերադարձը Ադրբեջանի կողմից օկուպացված հայկական շրջաններ,
- Ճանաչել միջազգային իրավունքին համահունչ Արցախի անկախությունը,
- Դադարեցնել Ռուսաստանի կողմից Ադրբեջանի սպառազինումը նորագույն հարձակողական ու զանգվածային ոչնչացման զենքերով, որոնք օգտագործվել եւ օգտագործվելու են Հայաստանի ու Արցախի դեմ»:
Հիշեցնենք, որ Հայաստանի արտգործնախարար Էդվարդ Նալբանդյանի հրավերով ապրիլի 21-22-ը ՌԴ արտաքին գործերի նախարար Սերգեյ Լավրովը պաշտոնական այցով կգտնվի Հայաստանում: Երթի կազմակերպիչները պնդում են, որ Ռուսաստանի արտգործնախարար Սերգեյ Լավրովը պատրաստվում է Հայաստանի իշխանությունների հետ քննարկել է «Ղարաբաղյան հակամարտության կարգավորման Կրեմլի պլանը», որն իրենք համարում են «հակահայկական», մատնանշելով ռուսաստանյան լրատվամիջոցներում հրապարակված կարգավորման որոշ թեզեր:
Նելլի ԳՐԻԳՈՐՅԱՆ
ռսեր բարիով հեռացեք մի ստիպեք վոր ձեր համար առժանի մեթոդով տեղի ունենա