«Եթե բանակցությունների հաջորդ փուլը կայանա հունիսին, կարեւոր խնդիր է, թե մարտավարական համարվող պայքարում որ կողմը կկարողանա խուսափել բանակցությունները տապալողի կարգավիճակից»,-ասում է Երեւանի մամուլի ակումբի նախագահ Բորիս Նավասարդյանը:
«Տեսակետ» մամուլի ակումբում մայիսի 25-ին նա այսպիսի կարծիք հայտնեց. հավանականությունը մեծ է, որ ԼՂ հակամարտության շուրջ բանակցությունները կտապալվեն, թեեւ տապալողը լուրջ պատասխանատվության առաջ կկանգնի, իսկ վերջինիս դիրքերը բանակցային գործընթացում կթուլանան:
«Հայաստանը պետք է ամեն կերպ ցույց, տա որ կառուցողական մոտեցում ունի: Այլ է հարցը, թե որ մեթոդն է ընտրվելու հակամարտության հաղթահարման համար` փուլայինը, թե փաթեթայինը: Արժե հիշել մի սկզբունք` ցանկացած փուլում հավասարապես պետք է շահի եւ կորցնի յուրաքանչյուր կողմը: Բանակցություններում Ադրբեջանը փորձելու է հասնել նրան, որ որոշակի տարածքներ վերադարձվեն իրեն, դրանից պակաս բան չի ակնկալում, հետեւաբար, Ադրբեջանը պետք է ցույց տա, որ պատրաստակամ է բանակցել»,-նշեց Բորիս Նավասարդյանը:
Նրա դիտարկմամբ` ապրիլյան պատերազմի դասերից է այն փաստը, որ գործընկեր-պետության իդեալականացումը խանգարում է հասնել նպատակին. «ՀՀ-ն իդեալականացրեց ՌԴ-ին` որպես անվտանգության երաշխիք-պետության, եւ տեսանք, թե ինչպիսի հիասթափություն ապրեց մեր հասարակությունը պատերազմից հետո: Չկա որեւէ գերտերություն, որը մեր նման փոքր երկրների հույսերը կվերցներ իր վրա: Նման երկիր չի էլ կարող լինել, այնպես որ, հանգիստ է պետք վերաբերվել նրան, որ ՌԴ-ն իր շահերին համապատասխան է գործում: Միայն այն դեպքում կարող ենք օգուտ ստանալ Ռուսաստանից, երբ օգուտը համապատասխանի Ռուսաստանի շահերին»:
Կարդացեք նաև
Նավասարդյանի համոզմամբ` պետք է ունենալ այլընտրանքային գործընկերներ, զարգացնել հարաբերությունները ԵՄ-ի հետ եւ հրաժարվել Ադրբեջանում անցկացվելիք սպորտային-մշակութային միջոցառումներին մասնակցելուց` այդ կերպով ցույց տալով միջազգային հանրությանը, որ Ադրբեջանում ապահովված չէ հայի անվտանգությունը:
Այլ մանրամասները` տեսանյութում:
Լուիզա ՍՈՒՔԻԱՍՅԱՆ
