Երևանի քաղաքապետարանում տեղի ունեցած աշխատանքային հերթական խորհրդակցության ժամանակ քաղաքապետ Տարոն Մարգարյանին զեկուցվել է, որ սահմանված ժամանակացույցով մայրաքաղաքի վարչական շրջաններում շարունակվում են բազմաբնակարան բնակելի շենքերի մուտքերի, ինչպես նաև հարթ և թեք տանիքների վերանորոգման աշխատանքները: Զեկուցվել է նաև, որ արդեն իսկ կազմվել է մուտքերի վերանորոգման 2016-2019 թվականների աշխատանքների իրականացման ծրագիրն ու ժամանակացույցը: Քաղաքապետ Տարոն Մարգարյանը հանձնարարել է հետևել աշխատանքների որակի պահպանմանը, ինչպես նաև բնակչությանը պարբերաբար ներկայացնել ինչպես ընթացիկ աշխատանքները, այնպես էլ կազմված ծրագիրն ու ժամանակացույցը:
Զեկուցվել է, որ սահմանված ժամանակացույցով ընթանում են Գլխավոր պողոտայի հարակից այգու վերակառուցման երկրորդ փուլի, ինչպես նաև Վերնիսաժի տարածքում իրականացվող վերակառուցման աշխատանքները: Նաև զեկուցվել է, որ նախկինում այդ տարածքում օգտագործված իրերի վաճառք իրականացնող 350 անձինք իրենց գործունեությունը շարունակում են «Հրազդան» մարզադաշտի հարակից տարածքում, որտեղ ապահովված են անհրաժեշտ պայմաններ:
Շինարարության և բարեկարգման վարչության պետը զեկուցել է, որ մայրաքաղաքում շարունակվում է հսկողությունը փողոցների ճաքալցման և փոսանորոգման, ինչպես նաև ասֆալտապատման աշխատանքների, բացի այդ նաև շինհրապարակների պատշաճ կազմակերպումն ու կահավորումն ապահովելու ուղղությամբ: Քաղաքապետը հանձնարարել է ակտիվացնել ընթացիկ աշխատանքները՝ ուշադրության կենտրոնում պահելով որակի ու ժամկետների պահպանումը:
Քաղաքի գլխավոր դիզայները զեկուցել է, որ շարունակվում են երկաթյա կառուցվածքների ներկման և բակերի նկարազարդման աշխատանքները: Նստարանների և աղբամանների վերանորոգման աշխատանքների հետ կապված էլ նշվել է, որ այդ ուղղությամբ աշխատանքներն ավարտվել են, սակայն գրանցվում են նստարանների միտումնավոր վնասման և կոտրման դեպքեր: Քաղաքապետը հանձնարարել է սեղմ ժամկետներում վերականգնել դրանք, բացի այդ ոստիկանության հետ համատեղ նաև գործնական քայլեր ձեռնարկել քաղաքային գույքը միտումնավոր վնասող անձանց հայտնաբերելու և պատասխանատվության ենթարկելու ուղղությամբ:
«Համայնքային գույքի և ընդհանրապես քաղաքի հանդեպ նման վերաբերմունքը պետք է խստորեն դատապարտվի ու օրենքով սահմանված կարգով պատժվի: Նման արատավոր երևույթները պետք է բացառվեն: Ըստ այդմ, ոստիկանության հետ համագործակցելով, վարչական շրջանների համապատասխան բաժինների աշխատակիցների հետ միասին գործնական քայլեր ձեռնարկեք այդ ուղղությամբ», – ընդգծել է Տարոն Մարգարյանը:
Խորհրդակցության ընթացքում թեքահարթակների կառուցման աշխատանքների ընթացքի մասին էլ զեկուցվել է, որ Երևանի քաղաքապետարանի 2016 թվականի ծրագրով մայրաքաղաքում նախատեսված է կառուցել փողոցների հետիոտնային անցումների շուրջ 270 թեքահարթակ, որոնցից 130-ն արդեն իսկ կառուցվել է: Հիշեցնենք, որ ինչպես շինարարության ընթացքում, այնպես էլ աշխատանքների ավարտից հետո, պատասխանատուներից բացի, այդ ամենը տեղում հետևում և գնահատում են նաև շահառու ՀԿ-ների ներկայացուցիչները:
Երևանի քաղաքապետարանի տեղեկատվության և հասարակայնության հետ կապերի վարչություն
