«Ապրիլը ցույց տվեց, որ մենք չպետք է սպասենք եւ հուսանք, որ մեր փոխարեն ինչ-որ միջազգային կազմակերպություն կքննադատի Ադրբեջանի ագրեսիվ գործողությունները: Այսօր մենք ականատես ենք միջազգային իրավունքի եւ միջազգային անվտանգության համակարգի, Հելսինկյան ակտի տապալմանը: Յուրաքանչյուր պետության, ազգի անվտանգությունը սեփական խնդիր է դարձել: Այդ իսկ պատճառով անհրաժեշտ է լրջորեն վերափոխել Հայաստանի քաղաքական իշխանությունը եւ միտքը», նման կարծիք հայտնեց «Առավոտ»-ի հետ զրույցում` Արցախի հանրապետական կուսակցության նախագահ, «Հելսինկյան նախաձեռնություն-92»-ի ԼՂՀ կոմիտեի համակարգող, խաղաղության եւ մարդու իրավունքների միջազգային մրցանակների դափնեկիր, իրավապաշտպան Կարեն Օհանջանյանը:
«Հայաստանը պետք է ռազմական, քաղաքական եւ բարոյական տեսանկյունից պատրաստ լինի պատժել յուրաքանչյուրին, ով վտանգ է սպառնում իր քաղաքացիների ֆիզիկական անվտանգությանը: Ադրբեջանի ագրեսիվ գործողություններին ի պատասխան Հայաստանը պետք է Ադրբեջանին ջախջախիչ հարված հասցներ ոչ միայն այն ուղղությամբ, որտեղ տեղի է ունեցել ագրեսիան, այլ ցանկացած ուղղությամբ, որտեղ առաջանում են վտանգներ: Այն, որ այդ ամենը տեղի չի ունեցել` խոսում է նրա մասին, որ կոռուպցիայի մեջ թաղված եւ իրենց իշխանավարումը շարունակելու մտքերով տարված իշխանությունն է մեղավոր Ադրբեջանի անպատժելիության համար: Հենց Հայաստանի քաղաքական իշխանության անտարբերությունից է բխում միջազգային միջկառավարական կառույցների չեզոք դիրքորոշումը», կարծում է ղարաբաղցի իրավապաշտպանը:
Ղարաբաղցի իրավապաշտպան Կարեն Օհանջանյանի հետ հարցազրույցը կարդացեք հունվարի 24-ի տպագիր «Առավոտ»-ում:
ԷՄՄԱ ԳԱԲՐԻԵԼՅԱՆ
