ՀՀԿ-ական Սամվել Ֆարմանյանն ապրիլի 2-ին «Մեդիա կենտրոնում» նշեց, որ իրավապահ մարմինները եւ դատախազությունը համարժեք արձագանք են տվել բոլոր ընտրախախտումներին, եւ սա այն դեպքում, երբ 1500-ից ավելի պատգամավորական թեկնածու է եղել, 1,5 մլն ընտրող: Նրա խոսքով, բազմաթիվ դիտորդներ, ինչպես միջազգային դիտորդական առաքելություններ, այնպես էլ տեղական, ծածկել են հանրապետության ամբողջ տարածքը, բոլոր քաղաքական կուսակցությունները հնարավորություն ունեցել են վիդեոհեռարձակման միջոցով ունենալ վերահսկման հնարավորություն:
Նրա ձեւակերպմամբ` իդեալական չէին ընտրությունները, բայց առաջընթացի մեխանիզմներ կային, ինչն ընձեռվում էր նոր ընտրակարգով:
Սամվել Ֆարմանյանն ընդգծեց, որ քարոզարշավն ընթացել է հավասար պայմաններում, բոլոր ուժերը կարողացել են իրենց ասելիքը փոխանցել լսարանին, ԶԼՄ-ներն էլ, նրա համոզմամբ, բոլորին հավասար են լուսաբանել:
ՀՀԿ ներկայացուցիչը դատապարտեց բոլոր երևույթները, որոնք ուղղված են եղել ԶԼՄ-ների աշխատանքները խանգարելուն: Նա կոչ արեց քաղաքական ուժերին իրենց պարտության պատճառը ուրիշների մեջ չփնտրել:
Կարդացեք նաև
Ինչ վերաբերում է ընտրակաշառքի մասին ահազանգերին, Ֆարմանյանը հույս ունի, որ բոլոր հաղորդումները պատշաճ ուսումնասիրության կենթարկվեն:
Նա նաեւ շեշտեց, որ նոր ձեւավորվելիք խորհրդարանը մեկ քայլ առաջ կլինի նախորդից:
Գոհար ՀԱԿՈԲՅԱՆ
Լուսանկարը` «Մեդիա կենտրոն»-ի
