Կիեւում անցկացված Ուկրաինայի գավաթի խաղարկությունից հետո ջրացատկի Հայաստանի հավաքականը հանդես է գալու Մադրիդի «Գրան Պրիում» (մայիսի 26-ից 28-ը): Այս մասին տեղեկացրել է մարզաձեւ ազգային հավաքականի գլխավոր մարզիչ Հրաչյա Չանդիրյանը:
Մարզիչը հայտարարել է, որ Իսպանիայում հանդես գալու են Ազատ եւ Վլադիմիր Հարությունյան եղբայրները, չնայած այն բանին, որ Ազատ Հարությունյանը դեռ լիովին չի ապաքինվել վնասվածքից: «Ազատը լիարժեք չի վերականգնվել, սակայն դեռ ժամանակ կա: Մադրիդի «Գրան Պրիին» Ազատը կմասնակցի միայն սինքրոն ցատկերում, որպեսզի շատ չծանրաբեռնվի եւ վնասվածքը չխորանա, իսկ Վլադիմիրը հանդես կգա նաեւ անհատական ցատկերում», – ասել է Հրաչյա Չանդիրյանը եւ հավելել, որ եղբայրների մարզավիճակը, թեև իդեալական չէ՝ պատրաստվելու քիչ ժամանակ ունեն, բայց փորձելու են հասնել առավելագույնին:
Մարզիչը Մադրիդի «Գրան Պրին» դիտարկում է որպես Եվրոպայի առաջնության նախապատրաստության փուլ: Նրան Իսպանիայում գրանցվելիք արդյունքներին այնքան էլ առաջնային չեն, թեեւ ձգտելու են առավելագույնին: Դա մեծապես կախված է լինելու այն բանից, թե ուժեղագույն մարզիկներ մասնակցելո՞ւ են, թե` ոչ:
Ջրացատկի Եվրոպայի առաջնությունը կայանալու է հունիսի 12-18-ը՝ Կիեւում: Հայաստանը ներկայացված լինելու է երեք մարզիկով, սակայն հավաքականի գլխավոր մարզիչը դեռեւս չի որոշել թիմի կազմը:
Աշոտ ՀԱԿՈԲՅԱՆ
