Ըստ երկրապահական շրջանակներից հասած տեղեկությունների, այս օրերին քննարկվում է Վազգեն Սարգսյանի հնարավոր հրաժարականի հարցը, որի արդյունքում նախարարն ընտրելու է իր հետնորդին եւ կենտրոնանալու է զուտ կուսակցական-քաղաքական գործունեության վրա: Դա ճիշտ որոշում կլինի այնքանով, որքանով զինվորական լծակներ ունեցող իշխանության կուսակցությունից ոչ մի լավ բան չի ստացվի: Սակայն, թեեւ քաղաքացիական հասարակարգի ձեւավորման տեսակետից դա կարող է դրական լինել, բայց մեր բանակի համար՝ ամենեւին ոչ: Հայտնի է, որ ազնիվ եւ նվիրված սպաները շարունակում են իրենց ծառայությունը առաջին հերթին Վազգեն Սարգսյանի հեղինակության շնորհիվ: Այնպես որ, ամենաճիշտը հակառակը կլիներ. նախարարը զբաղվեր միայն բանակով եւ քաղաքականությանը չխառնվեր:
ՎԱՏ ԼՈՒՐ
Լրագրողներից մեկը Սերգեյ Բադալյանին խնդրեց մեկնաբանել մեկ օր առաջ Վանո Սիրադեղյանի կողմից արված այն հայտարարությունը, թե ինքը «էս երկիրը կդզի Վազգեն Մանուկյանի եւ Կարեն Դեմիրճյանի հետ»։ Ընկեր Բադալյանը մեկնաբանեց. «Երբ որ մենք ասում ենք ոհմակ, հենց այդտեղ տեսնում ենք այդ վտանգը։ Վտանգը, որովհետեւ համախմբվում են ուժեր, որոնք սկսեցին այս երկրի քայքայումը, որոնք շարունակում են այս երկրի քայքայումը, որոնք շարունակում են հանդերձյալ աշխարհից ինչ-որ կերպարներ բերել իրենց փրկելու համար, միայն թե խափանեն սոցիալիստական վերածնունդը, իրական ժողովրդավարության վերածնունդը Հայաստանում… Ցավոք, Դեմիրճյանը չեկավ ասպարեզ, որ հիշի իր կոմունիստական անցյալը։ Նրան բերում են ասպարեզ, որ մանուկյանների, սիրադեղյանների, եգորյանների, շահնազարյանների հետ խափանի կոմկուսի վերադարձը։ Միայն հույս ունեմ, որ Կարեն Դեմիրճյանը հասկանում է, թե ինչպիսի սոսկալի վիճակի մեջ են իրեն գցում, ինչ մեղք է գործել եւ շարունակում է գործել»։
Եթե կոմունիզմի դեմ պայքարի առաջամարտիկը Կարեն Դեմիրճյանն է, ապա «կարմիր քիմեռների» վերադարձի վտանգն իսկապես լուրջ է։
