![\"\"](\"https://www.aravot.am/2009/aravot_arm/March/25/p17.jpg\")
ՄԱԿ-ի հայաստանյան գրասենյակը եւ արտակարգ իրավիճակների նախարարության Հայաստանի փրկարար ծառայությունն «Արմենիա-Մարիոթ» հյուրանոցում մարտի 24-26-ը կազմակերպել են INSARAG-ի (Միջազգային որոնողափրկարարական խորհրդատվական խումբ)՝ երկրաշարժի արձագանքման խաղարկային վարժանք: Նման խաղարկային վարժանքները, ըստ ԱԻՆ ծառայության, «իրազեկման եւ ուսուցման յուրօրինակ դասընթացներ են»:
Հայաստանում իրականացվող երկրաշարժի արձագանքման խաղարկային վարժանքի նպատակը պետական կառավարման եւ տեղական ինքնակառավարման մարմինների իրազեկության բարձրացումն է INSARAG-ի կողմից աղետներին արձագանքելու մեթոդաբանության վերաբերյալ, ինչպես նաեւ փորձարկելու միջազգային եւ ազգային արձագանքողների համակարգումն ու համագործակցությունը այնպիսի խոշոր աղետների ժամանակ, ինչպիսին երկրաշարժն է: Հայաստանյան վարժանքին մասնակցելու են 22 երկրների աղետների կառավարման հարցերով զբաղվող ղեկավարներ եւ USAR-ի թիմեր, ՄԱԿ-ի տարբեր գործակալություններ՝ իրենց տեղական գործընկերների հետ, Հայաստանում գործող միջազգային կազմակերպություններ եւ համապատասխան հաստատությունների արտակարգ իրավիճակներով զբաղվող ղեկավարներ: Մարտի 26-ին ցուցադրական ելույթներ կկազմակերպվեն Արզնու ձորում:
