![\"\"](\"https://www.aravot.am/2009/aravot_arm/March/31/p1.jpg\")
Կենտրոն եւ Նորք-Մարաշ համայնքների առաջին ատյանի դատարանում երեկ շարունակվեց դատարանի հանդեպ անհարգալից վերաբերմունքի մեջ մեղադրվող «ՉԻ» եւ «Առավոտ» օրաթերթերի ֆոտոթղթակից Գագիկ Շամշյանի դեմ գործի դատաքննությունը: Ըստ «ՆՏ»-ի՝ դատական նիստում ավարտվեց վկաների հարցաքննությունը: Նույն դատարանի դատական կարգադրիչների ստորաբաժանման ղեկավար Արթուր Փիլոսյանը, կարգադրիչներ Ռաֆայել Ստեփանյանը, Շահեն Օհանյանը, դատական նիստերի քարտուղար Հասմիկ Ջալալյանը հայտարարեցին, որ Սմբատ Այվազյանի դեմ գործով 2008թ. օգոստոսի 5-ի դատական նիստի ժամանակ Շամշյանը չի ենթարկվել նկարահանումները դադարեցնելու մասին դատավոր Գագիկ Ավետիսյանի կարգադրությանը, դատարանի հասցեին թույլ է տվել վիրավորական արտահայտություններ: Պաշտպանական կողմը դատական նիստերի քարտուղարին հարց տվեց, թե տարբերություն կա՞ լուսանկարելու եւ սղագրելու, ձայնագրելու միջեւ, եւ ի՞նչ կապակցությամբ է ֆոտոթղթակիցը արել՝ «Արի, մեր տեղը նյութ գրի, սրբագրություն արա» արտահայտությունը, որը համարվում է վիրավորական: Պաշտպանը հիշեցրեց, որ ի պատասխան դատավորի կարգադրությանը՝ դադարեցնել լուսանկարահանումը, թղթակիցը պատասխանել է՝ «Չեմ լուսանկարում, ձայնագրում եմ»: Նախատեսված է, որ ապրիլի 2-ի նիստում ցուցմունքով հանդես կգա Գագիկ Շամշյանը: