Տասնամեակէ ի վեր աւանդութիւն դարձած է ԱՐԱՐԱՏ տարեցներու տան մէջ կազմակերպել հայոց պատմութեան եւ մշակոյթին նուիրուած ընդհանուր զարգացման մրցոյթ (Armenian Quiz Bowl), զոր խանդավառութեամբ կը ղեկավարեն տէր եւ տիկին Արշակուները: Կը մասնակցին գրեթէ բոլոր հայկական վարժարաններու 8-րդ դասարաններու ներկայացուցիչները: Պատրաստութիւնը երկար ու յամառ աշխատանք կը պահանջէ թէ՛ աշակերտներէն եւ թէ՛ ուսուցիչեն:
ՀԲԸՄ Մանուկեան-Տեմիրճեան վարժարանը կը ներկայացնէին Գաթրինա Գարապօղոսեան, Գարլա Մարուքօղլու եւ Միրէյ Ադամեան։ Անոնք անցնող ամիսներուն ամենայն աչալրջութեամբ ու պատասխանատւութեամբ պատրաստուեցան իրենց հայերէնի ուսուցչուհի տիկ. Էլիզապէթ Միրզոեանի հսկողութեան տակ՝ տիրանալով Աոաջին մրցանակին, հաւաքելով 96 միաւոր:
Ներկայ էին հոծ թուով աշակերտներ ու ծնողներ, որոնք եկած էին քաջալերելու իրենց վարժարանի մասնակիցները: Կը տիրէր խանդավառ ու լարուած մթնոլորտ մը, որ յատուկ է նման ձեռնարկներու։ Բոլոր մասնակիցներն ալ եկած էին մրցանակային տեղերը գրաւելու վստահութեամբ, չէ՞ որ անոնք իրենց դասերու կողքին յաւելեալ բազում ժամեր տրամադրած էին ցանկալի յաղթանակ մը ձեռք բերելու համար:
Հայկական դպրոցներուն գոյութեան գլխաւոր նպատակն է հայրենիքէն դուրս ծնած ու հասակ առնող հայ տղաքն ու աղջիկները պատրաստել վաղուան հայ կեանքին, ըլլան տիպար հայեր, գիտակից իրենց անցեալին ու տէրը հայկական պահանջատիրութէան։ Նման մրցումներ կու գան ամբողջացնելու հայ դպրոցին ի գործ դրած ճիգը եւ կերաշխաւորեն ազգին գոյատեւումը: 29 մարտ 2009-ի մրցոյթը փաստեց, թէ մեր տղաքն ու աղջիկները լրջօրէն կը վերաբերին իրենց վրայ դրուած յոյսերուն;
Նախորդ մրցումներուն մեր վարժարանը յաջողած է գրաւել 2-րդ եւ 3-րդ տեղերը, նոյնիսկ մրցանակային տեղեր չգրաւած տարիներուն մեր աշակերտները հպարտութեամբ հեռացած են մրցոյթէն՝ յոսալով, որ յառաջիկայ տարի մեր դպրոցը կը շահի Առաջին մրցանակը: Եւ այսպիսով, այս տարուան 8-րդ դասարանը իրականացուց այդ երազը: Ապրին բոլոր մասնակիցները: Կը շնորհաւորենք մեր վարժարանի յաղթողները:
