Արտասահմանյան մարզական լրատվամիջոցները տեղեկացնում են, որ Միջազգային օլիմպիական կոմիտեն (ՄՕԿ) մտադիր է այս տարվա օգոստոսի 13-ին Բեռլինում նշանակված գործկոմի նիստում վերջնականապես կողմնորոշվել, թե կանանց սիրողական բռնցքամարտն արժե՞ ընդգրկել 2012 թվականին Լոնդոնում կայանալիք ամառային օլիմպիական խաղերի ծրագիր:
ՄՕԿ-ը ժամանակին հայտարարել է, որ այդ խնդրով սիրողական բռնցքամարտի միջազգային ֆեդերացիայի (AIBA) ներկայացրած միջնորդությունը քննարկման փուլում է: Հիշեցնենք, որ մարզաձեւը դեռ Պեկինի օլիմպիական խաղեր մտցնելու նախորդ նախաձեռնությունը եղել է 2005 թվականին: Սակայն անհաջողության է մատնվել, քանի որ այն ժամանակ Միջազգային օլիմպիական կոմիտեն գտավ, որ կանանց բռնցքամարտն աշխարհում դեռ անհրաժեշտ տարածում չունի:
ՄՕԿ-ի հայտարարության մեջ նշված է նաեւ, որ ներկայումս համապատասխան հանձնաժողովը զբաղվում է այդ հարցով, որի արդյունքների ամփոփումից հետո առաջարկներ է ներկայացնելու գործկոմ: Եվ միայն դրանց հիման վրա է որոշում կայացվելու:
Տեղեկացնենք, որ ամառային օլիմպիական խաղերի ծրագրում ընդգրկված 26 մարզաձեւից միայն բռնցքամարտն է, որը չունի կանանց օլիմպիական մրցաշար:
