![\"\"](\"https://www.aravot.am/2009/aravot_arm/April/10/p7.jpg\")
Շախմատի Հայաստանի ազգային հավաքականի կազմում համաշխարհային օլիմպիադայի կրկնակի չեմպիոն, գրոսմայստեր Վլադիմիր Հակոբյանը վերջերս իր հարցազրույցներից մեկում տվել է համաշխարհային օլիմպիադաներում Ռուսաստանի ընտրանու անհաջողությունների իր մեկնաբանությունը:
Ի տարբերություն մեր հավաքականի համախմբվածությանը եւ թիմում տիրող միասնականության մթնոլորտի, Վլադիմիրի կարծիքով՝ «Ռուսաստանի հավաքականում բացակայում է թիմային ոգին: Եթե անկողմնակալ լինենք, նրանց հավաքականը ուժեղ է բոլոր թիմերից: Այդ է վկայում նրանցից յուրաքանչյուրի չափազանց բարձր վարկանիշը: Սակայն հնարավոր է, որ նրանց հավաքականի անդամները մի փոքր «երես են առել» միջազգային խոշոր մրցաշարերում, բոլորն էլ ֆինանսապես ապահովված են: Ու դրանից է, որ օլիմպիադաներին այնքան էլ լուրջ չեն վերաբերվում: Նրանք անհատականություններ են, բայց յուրաքանչյուրն՝ իր համար: Ավելացնենք նաեւ, որ բոլորն էլ, ուժեղ շախմատիստ լինելով, մշտապես միմյանց հետ մրցակցության մեջ են, ինչը չի նպաստում հավաքականի իրենց ընկերների առջեւ նախապատրաստության սեփական գաղտնիքները բացելուն: Սրանք օբյեկտիվ գործոններ են, որոնք խանգարում են նրանց: Սակայն ինչ էլ լինի, միեւնույն է, ուժեղագույն թիմը պետք է հաղթի օլիմպիադայում»:
Վլադիմիր Հակոբյանի կարծիքով, վերջին տարիներին անցկացված մրցումների ֆավորիտների անհաջողության պատճառը ներթիմային խնդիրներն են:
«Դրանք կապված են կամ սխալ ղեկավարության, մարզչի հետ, կամ էլ շախմատիստները լրջորեն չեն տրամադրվում: Օլիմպիադաները եւ թիմային մյուս մրցաշարերը ցույց են տալիս, որ սրանք շատ կարեւոր բաներ են: Եթե անհատական մրցումներում ռուսների հաջողությունները բարձր են, թիմայիններում հակառակն է: Մի կարեւոր հանգամանք էլ. ռուսները պայքարում են միայն ու միայն առաջին տեղի համար եւ ինչ-որ մի պահ նրանց արդեն այնքան էլ չի հետաքրքրում՝ երկրո՞րդ, թե՞ երրորդ տեղ կգրավեն, որովհետեւ դա նրանց համար արդեն իսկ անհաջողություն է»:
