Ձեռքից թողնված բրոնզե մեդալ

Վրաստանի մայրաքաղաքում պայքարն ավարտեցին հունահռոմեական ոճի ըմբշամարտի Եվրոպայի երիտասարդական առաջնության մասնակիցները:

Երեկ մրցագորգը տրամադրվել էր 50, 60, 74 եւ 96 քաշային կարգի ըմբիշներին: Հայաստանցի մասնագետները երեկվա մրցահերթում առավել շատ հույսեր կապում էին մինչեւ 50կգ քաշային, աշխարհի երիտասարդական առաջնության արծաթե մեդալակիր Սարգիս Խաչատրյանի հետ: Նա չնայած նախնական գոտեմարտի մեկնարկային փուլում իրեն դրսեւորեց որպես պայքարող ըմբիշ, բայց վիճակահանության առաջադրած պայմաններն էլ հաղթահարելուց հետո ստիպած էր պայքարել ընդամենը երրորդ մրցանակային տեղի համար: Սակայն Սարգիսն այս անգամ էլ ձախողվեց ու վերջնահաշվարկում զբաղեցրեց 5-րդ տեղը:

Մեր մյուս ըմբիշները՝ երեւանցիներ Ռոբերտ Հովհաննիսյանը՝ 60 կգ քաշային կարգ, Էդուարդ Սողոմոնյանը՝ 96 կգ, ինչպես նաեւ գյումրեցի Ռաֆիկ Մանուկյանը՝ 74 կգ, բավարարվեցին Եվրոպայի առաջնության միջինից բարձր հորիզոնականներով: