Արդեն 10 օր է, ինչ սկսվել է Այրումհէկ-ի հարեւանությամբ գտնվող ավտոմոբիլային կամրջի նորոգումը: Տավուշի եւ Լոռու մարզերի սահմանագծին գտնվող կամուրջը տարիների ընթացքում խարխլվել է Այրումհէկ-ը սնող ջրանցքի հավելյալ՝ հիդրոկայանի աշխատանքի համար ոչ անհրաժեշտ ջրերից: Նոյեմբերյանի ճանապարհաշինարարական «Լեւոն Երկրորդ» ՍՊԸ-ի շինարարների խումբը կամրջի ձախ մասից սկսել է քանդել ասֆալտե ծածկը, որպեսզի մետաղյա խողովակներ տեղադրի: Ինչպես հայտնեց աշխղեկ Գրիշա Գաբրիելյանը, առաջիկայում իրենք կստանան կառույցի հիմնանորոգման նախագիծը, կլուծվի նաեւ ֆինանսավորման խնդիրը: Կամրջի ծածկն ամբողջությամբ քանդելուց հետո Հայաստան-Վրաստան միջպետական այս ճանապարհով երթեւեկը 2 օրով կդադարեցվի: Գրիշա Գաբրիելյանի խոսքով՝ կամրջի հիմնանորոգումը, ամենայն հավանականությամբ, կավարտվի մեկ ամսից:
Ներկայումս կամրջի վթարայնության պատճառով երթեւեկությունն այստեղ միակողմանի է, իսկ խոշոր ու ծանր բեռնատարները երթեւեկում են այլ՝ Նոյեմբերյան-Իջեւան ճանապարհով:
