![\"\"](\"https://www.aravot.am/2010/aravot_arm/March/31/p8.jpg\")
Չեչնիայի խորհրդարանի խոսնակ Դուկուվահա Աբդուռահմոնովը մարտի 29-ին Մոսկվայի մետրոյում տեղի ունեցած ահաբեկչական ակտերի համար մեղադրել է «մոսկովյան հատուկ ծառայություններին»: «Ռոսբալտի» փոխանցմամբ, խորհրդարանի նիստի ժամանակ Աբդուռահմոնովը հայտարարել է, թե՝ պայթուցիկ սարքերը մոսկովյան մետրո են բերվել մետրոպոլիտենի աշխատակիցների, անվտանգության ծառայությունների կամ իրավապահ մարմինների «բացարձակ անփութության» կամ հանցակցության արդյունքում: «Եթե բարձրաստիճան անձինք իրենց ղեկավարներին ներկայացվող հաշվետվություններում այսօր, որպես տեղի ունեցածի «մեղավոր», վկայակոչում են հյուսիսկովկասյան տարածաշրջանը, ապա պետք է հայտարարենք, որ տեղի ունեցածի համար մենք մեղավոր ենք համարում մոսկովյան հատուկ ծառայություններին, իրավապահներին կամ Մոսկվայի անվտանգության ուժերին: Մետրոյի նման ռազմավարական օբյեկտը պետք է պահպանվեր հատուկ ռեժիմով եւ անվտանգ լիներ: Իսկ եթե այնտեղ ինչ-որ բան հնարավոր է եղել անցկացնել, ապա դա եղել է բացարձակապես համապատասխան մարմինների անփութության կամ հանցակցության արդյունքում»,- հայտարարել է Չեչնիայի խորհրդարանի խոսնակը:
Նա նաեւ հայտարարել է, թե «ահաբեկիչները սեփական ժողովրդի թշնամիներ» են եւ կոչ է արել գտնել եւ պատժել հանցագործներին եւ ոչ թե դրա փոխարեն քննարկել նրանց ենթադրյալ ազգային պատկանելության հարցը: «Ոչ մի ժողովուրդ չի լիազորել հանցագործներին անել այն, ինչ նրանք անում են»,- ընդգծել է Աբդուռահմոնովը:
