Մոլդովայի աշխատանքի եւ սոցիալական պաշտպանության նախարարություն զանգած անհայտ անձը հայտարարել էր, թե նախարարության շենքում ռումբ է տեղադրված: Նա պահանջել էր իրեն $500 հազար վճարել, սպառնալով՝ հակառակ դեպքում ռումբը պայթեցնել: Ինչպես փոխանցում է lenta.ru-ն, ստացված տեղեկությունից հետո գերատեսչության ողջ անձնակազմը՝ ավելի քան 100 մարդ, շենքից տարհանվել էր, դեպքի վայր էին ժամանել ոստիկանությունն ու ականազերծողներ:
Նախարար Վալենտինա Բուլիգի ասելով, իրենց ահազանգած անձը պահանջել էր $500 հազարը վճարել առաջիկա ժամերի ընթացքում՝ թողնելով այն հասցեն, որով գումարը պետք է ուղարկվեր: Մոլդովայի ուժային կառույցների ներկայացուցիչներն անմիջապես մեկնել էին նշված հասցե: Նախարարության շենքում ականազերծողները որեւէ ռումբ կամ պայթուցիկ չեն հայտնաբերել, իսկ իրավապահ մարմինները ֆիքսել են այն հասցեն, որտեղից չարագործը զանգել էր նախարարություն: Ահաբեկչության մասին կեղծ ահազանգի հեղինակին, երկրի օրենսդրությամբ, սպառնում է տուգանք կամ ազատազրկում:
