Աբու Դաբիի երաժշտության եւ արվեստի միջազգային ամենամյա փառատոնն այս տարի առաջին անգամ հայ մասնակից է ունեցել: Մարտի 20-ից ապրիլի 7-ը տեղի ունեցած փառատոնին Հայաստանն ու հայկական երաժշտությունն է ներկայացրել քանոնահարուհի Հասմիկ Լեյլոյանը եւ «Կամերտոն» կամերային անսամբլը: Երեկվա ասուլիսում անսամբլի գեղարվեստական ղեկավար Լիանա Խանդկարյանը պատմեց, որ արաբ հանդիսատեսին ներկայացել են ոչ միայն հայ ու արտասահմանցի դասականների կատարումներով, այլեւ ժողովրդական գործերով. «Բազմազան ծրագիր էր»: Մոտ չորս տասնյակի հասնող ու տարբեր երկրներից ժամանած մասնակիցներից արաբ հանդիսատեսը հիացել է քանոնի հայկական ելեւէջներով: Տիկին Լեյլոյանը նշեց, որ արաբ հանդիսատեսի համակրանքն ու գնահատանքը նկատել է ոչ մայն ծափողջույններից, այլեւ տեսել է նրանց աչքերում. «Պագանինիի, Շոպենի, այլ դասականների կողքին հնչել է Բաբաջանյան, Խաչատրյան, Սայաթ-Նովա ու Նարեկացի, ներկայացրել եմ նաեւ ջազային կատարումներ: Տպավորություններն անպատմելի էին. ամեն ելույթի ավարտին մոտենում էր արաբ հանդիսատեսը ու պատմում, թե ինչքան է հուզվել, երբ Սայաթ-Նովա կամ «Օտար ամայի ճամփեքի վրա» ստեղծագործությունն է լսել»:
Տիկին Լեյլոյանը հպարտությամբ հայտնեց, որ իրենց համերգին ներկա է գտնվել նաեւ ԱՄԷ-ի մշակույթի եւ գիտության նախարար, փառատոնի հիմնադիր շեյխ Մուհամեդ Աբդուլահ Բին Զայեդ Ալ Նահյանը. «Ասում են՝ նա ոչ բոլոր համերգներին է լինում»: Հենց շեյխի ձեռքից էլ քանոնահարուհին ստացել է հատուկ մրցանակ ու մեդալ:
