Ազգային անվտանգության խորհրդի քարտուղար Արթուր Բաղդասարյանը վստահեցնում է, որ Հայաստանում ռուսական ռազմաբազաների տեղակայման ժամկետի երկարացման եւ դրանց անվտանգության լրացուցիչ գործառույթներ վերապահելու հեռանկարը չի սպառնում Հայաստանի ինքնիշխանությանը։ «Ազատություն» ռ/կ-ի հետ զրույցում պարոն Բաղդասարյանը, չհամաձայնելով այս առթիվ որոշ փորձագետների հնչեցրած մտահոգություններին, ասել է. «Հայաստանի Հանրապետությունը ինքնիշխան պետություն է, ունի իր զինված ուժերը եւ բոլոր հնարավորությունները՝ պաշտպանելու իր անվտանգությունը։ Բայց դաշնակիցների հետ, այնպիսի ռազմավարական գործընկերոջ հետ, ինչպիսին Ռուսաստանն է, երկկողմ համագործակցության խորացումը միայն ողջունելի է»։
Վերջին օրերին հայաստանյան մի շարք վերլուծաբաններ մտահոգություն են հայտնել, որ ռուսական ռազմաբազաներին Հայաստանի անվտանգության գործառույթներ վերապահելը էապես կնվազեցնի Հայաստանի ինքնիշխանությունը, քանի որ Հայաստանն այդպիսով կզրկվի կարեւորագույն ռազմաքաղաքական հարցերում ինքնուրույն որոշումներ կայացնելու հնարավորությունից: «Աբսուրդ» որակելով այս կարգի մտահոգությունները, Ազգային անվտանգության խորհրդի քարտուղարն ասել է. «Նման բան գոյություն չունի: Իրական մտահոգություն կա եւ կա պարզ շահարկում։ Իրապես մտահոգվածներին ուզում եմ ասել, որ մտահոգվելու ոչ մի անհրաժեշտություն չկա»։
