«Առավոտի» տեղեկություններով, այսօր երեկոյան «Ժառանգություն» եւ «Ազատ դեմոկրատներ» կուսակցությունների ղեկավարների մակարդակով հանդիպում է տեղի ունեցել, որի ժամանակ կողմերը քննարկել են «Ժառանգության» եւ ՀՅԴ-ի՝ ԱԺ 100 տոկոսանոց համամասնական ընտրակարգին անցնելու առաջարկի վերաբերյալ համատեղ հայտարարությունից բխող՝ օրենսդրական նախաձեռնությանն ու այդ համատեքստում առաջիկա համատեղ քայլերին առնչվող, ինչպես նաեւ այլ՝ խորհրդարանական ընտրություններին վերաբերող հարցեր:
Aravot.am-ը փորձեց այդ տեղեկությունը ճշտել նախ «Ժառանգություն» կուսակցության պատասխանատուներից: Կուսակցության վարչության փոխնախագահ Ռուբեն Հակոբյանը հաստատեց ազատ դեմոկրատների հետ հանդիպման փաստն ու նաեւ այն, որ քննարկման առարկան եղել է «Ժառանգության» եւ ՀՅԴ-ի համատեղ օրենսդրական նախաձեռնության շուրջ միասնական քայլերի մշակումը: «Իրենց հետ մենք ճանապարհ ունենք անցնելու: «Ազատ դեմոկրատների» հետ մենք պայմանավորվեցինք, որ կարող ենք շարունակել մեր համագործակցությունը, քանի որ գաղափարա-քաղաքական հարթության վրա բավականին լուրջ ընդհանրություններ ունենք: Բայց առաջիկայում՝ քաղաքական ֆորում է լինելու, որտեղ կլինեն ե՛ւ նրանք, ե՛ւ բոլոր այն ուժերը, որոնք զորակցել են մեր նախաձեռնությունը»,– ասաց Ռուբեն Հակոբյանը՝ հավելելով, որ հանդիպմանը մասնակցել են «Ժառանգության» կողմից՝ ինքն ու Արմեն Մարտիրոսյանը, իսկ «Ազատ դեմոկրատներից»՝ Խաչատուր Քոքոբելյանն ու Արարատ Զուրաբյանը:
«Ազատ դեմոկրատներ» կուսակցությունում եւս չժխտեցին այդ հանդիպման փաստը: Մեր հարցին, թե արդյոք խորհրդարանական ընդդիմության օրենսդրական նախաձեռնության շուրջ քննարկումներ եղե՞լ են նաեւ ՀՅԴ-ի հետ, մեզ պատասխանեցին, թե ՀՅԴ-ի հետ անմիջական շփումներ չեն եղել, բայց եղել են «Ժառանգության» կողմից միջնորդավորված տեսակետների փոխանակում եւ պայմանավորվածություններ:
Իսկ թե կարո՞ղ է այս ուժերի միջեւ համագործակցությունն ավելի լուրջ համագործակցության դաշտ բացել նրանց համար, կուսակցությունում ասացին, որ քննարկվող կոնկրետ հարցը կարեւորում են, բայց դա այն հարցը չէ, որի շուրջ հնարավոր է ավելի լայն համագործակցության մասին խոսել: Փոխարենն, ըստ ազատ դեմոկրատների, կոնկրետ խնդրի շուրջ «Ժառանգության» եւ ՀՅԴ-ի նախաձեռնությունը պաշտպանած ուժերը դատապարտված են միասնական քայլեր անելու ու փորձում են անել:
Կարդացեք նաև
Հանդիպման այլ մանրամասների մասին կարդացեք «Առավոտի» վաղվա տպագիր համարում
