Խորհրդարանական ընտրությունների մոտենալուն զուգահեռ՝ Արմավիրի մարզում կրկին թեժանում են խոսակցությունները, որ Էջմիածնի քաղաքապետ Կարեն Գրիգորյանը՝ գեներալ Մանվել Գրիգորյանի որդին, պատրաստվում է առաջիկա խորհրդարանական ընտրություններում ձեռք բերել պատգամավորի մանդատ: Ասում են, որ Կարեն Գրիգորյանի հավակնությունների շրջանակն այսքանով չի սահմանափակվում, նա այլընտրանք էլ ունի, արդեն գործադիրում՝ Արմավիրի մարզպետի պաշտոնը:
«Կարեն Գրիգորյանը շատ հրաշալի քաղաքապետ է, ժողովուրդը շատ բարձր է գնահատում իր արածները, շատ սերտ կապի մեջ է ժողովրդի հետ ու անավարտ ծրագրեր ունի, դրա համար էլի առաջադրվելու է քաղաքապետի համար, ուրիշ որեւէ պաշտոնի չի հավակնում, չի ուզում: Ինքը շատ է սիրում Էջմիածինը, ուզում է անընդհատ Էջմիածնի քաղաքապետ մնալ: Մի 30-40 տարվա ծրագրեր ունի քաղաքի հետ կապված եւ եթե քվե կստանա, ինքն այդքան ժամանակ կցանկանա մնալ քաղաքապետ»,- Aravot.am-ին իր պարզաբանումները ներկայացրեց Կարեն Գրիգորյանի մամուլի քարտուղար Վարդան Վարդանյանը:
Վերջինիս հավաստմամբ, Կարեն Գրիգորյանի 30-40 տարով քվե ստանալն էլ գրեթե կասկածներ չի հարուցում, քանի որ «ժողովրդի հետ շատ լավ է աշխատում»:
Նելլի ԳՐԻԳՈՐՅԱՆ
