«Օրինաց երկիր» կուսակցության հերթական 10-րդ համագումարին այսօր ներկա էր ՀՀ նախագահ , Հանրապետական կուսակցության նախագահ Սերժ Սարգսյանը, միջազգային կառույցների, Հայաստանում տարբեր երկրների դեսպանատների ներկայացուցիչներ, կոալիցիոն գործընկերները` ԲՀԿ նախագահ Գագիկ Ծառուկյանը, ՀՀԿ ից` Գալուստ Սահակյանը, «Ժառանգության» ներկայացուցիչը:
ՕԵԿ նախագահ Արթուր Բաղդասարյանի զեկույցից առաջ հրավիրվածները եւ կուսակցականները դիտեցին ՕԵԿ-ի անցած ուղուն նվիրված ֆիլմ, ՕԵԿ-ականները երգեցին իրենց կուսակցության օրհներգը, իսկ ՀՀ օրհներգը հնչեց Արթուր Բաղդասարյանի զեկույցից հետո միայն: ՕԵԿ նախագահի խոսքը մի քանի անգամ ընդմիջվեց ծափահարություններով:
Կուսակցության նախագահը զեկույցը սկսեց իր մասին խոսելով. «Ես իրավունք չունեմ ձեզ հիասթափեցնելու, իրավունք չունեմ վարանելու, իրավունք չունեմ ձախողելու: Մի ժամանակ ես համոզված էի, որ քաղաքականությունը կապ չունի մարդու անձնական ապրումների հետ եւ ուժեղ մարդը տիրապետում է իր զգացմունքներին: Այժմ ես հասկացել եմ, որ մարդու ուժը նաեւ զգացմունքների մեջ է: Ես ճանաչել եմ դժվարություններ եւ ձախողումներ եւ գիտեմ ինչպես հաղթահարել դրանք: Ես գիտեմ , թե ինչ է վախն ու կասկածը եւ քաջությունը հենց դրանց հաղթահարման մեջ է: Ես հասկանում եմ այն մարդկանց, ովքեր չեն վստահում քաղաքականությանը , քանզի բազմիցս խաբել են նրանց: «Օրինաց երկիրը» երբեք չի խաբել իր քաղաքացիներին, «Օրինաց երկիրը» , սակայն, հաճախ հասկացված չի եղել:»: