«Միացի՛ր փոխենք», ասում է ԱԺ ընտրություններին թիվ 7 մեծամասնական ընտրակարգով առաջադրված պատգամավորի թեկնածու Տիգրան Գրիգորյանը:
«Այն, որ երկրում փոփոխությունները առաջին անհրաժեշտության հրամայականն է, ոչ ոք չի կասկածում եւ այդպես հռչակել է նույնիսկ այն քաղաքական ուժը, որը վերջին 10 տարում եղել է երկրում գերիշխող քաղաքական ուժ: Փոփոխություն իսկապես անհրաժեշտ է: Իմ համոզմամբ՝ փոփոխությունները սոցիալական միջավայրում հնարավոր է միայն մարդկանց միջոցով, արձագանքելով միասին փոխենք երկիրը կոչին»,- ասում է Գրիգորյանը, ըստ որի՝ թիվ 7 ընտրատարածքում ինֆորմացիոն բլոկադա է տիրում: Ցուցատախտակները, որոնք հատկացված են թեկնածուների նախընտրական պաստառների համար , դրանց բաշխվածությունը, ըստ թեկնածուի՝ համաչափ չէ: «Փակցված պաստառները հետեւողականորեն պոկվում են, իսկ նման երեւույթները պատիվ չեն բերում քաղաքական պրոցեսներում: Ընտրողների շրջանում տարածված է հիասթափության մթնոլորտը, շատերը համոզված են, որ իրենց ձայնը ոչինչ չի փոխի»,- հավելեց Գրիգորյանը՝ հայտնելով, որ ինքը քաղաքական գործունեությամբ զբաղվելու համար հավանություն ստանալու չի գնացել ոչ նախագահական, ոչ էլ քաղաքական ուժերի մոտ:
Տիգրան Գրիգորյանը հաստատեց շրջանառվող լուրը, որ դիմել է տարբեր կուսակցությունների՝ իր ընտրագրավը մուծելու համար: Սկզբում փորձել է համագործակցել ընդդիմադիր քաղաքական ուժերի հետ, բայց չի ստացվել, ինչի արդյունքում ինքն իր համար որոշակի բացահայտումներ է արել, ինչն էլ հարստացրել է ՀՀ քաղաքական իրականության մասին իր պատկերացումները: Արդյունքում՝ «Ընտրագրավը հավաքել եմ ընկերներիս հանգանակության միջոցով»:
Եվա ՀԱԿՈԲՅԱՆ
