Այսօր սոցիալապես անապահով մի խումբ արթիկցիներ հավաքվել էին մշակույթի տան դիմաց` երկրի նախագահին անձամբ տեսնելու ու նրան իրենց խնդրանք –նամակը փոխանցելու: Հավաքվածները մեզ վստահեցնում էին, որ իրենք նախագահի ջերմ երկրպագուն են, ՀՀԿ անդամ են, և որ համոզված են` նախագահն իրենց կլսի ու կընդառաջի:
Կանանցից մեկը` Արթիկի մարզահամալիրում որպես հավաքարար աշխատող Թամարա Մատինյանը, Aravot.am-ին ասաց. «Իմ տղան էս պահին զինվորական ծառայության մեջ է ,սահմանի բերանում է, սովորում է Երևանի պետական համալսարանի պատմական ֆակուլտետի 2-ր կուրսում: Ես մտահոգ եմ, որ նոյեմբերին կզորացրվի: Ես լրագրողի` Արտավազդ Մատինյանի կինն եմ , ամուսինս մահացած է, մեր նախագահի հատկացրած աշխատավարձն էլ 35 հազար դրամ է, մտահոգվում եմ , որ էրեխաս եկավ, ինչպե՞ս վճարը տամ , որ կրթությունը շարունակի: Եվ հետո որտե՞ղ մնա, գոնե հանրակացարանի մի անկյուն հատկացնեն գիշերելու տեղ ունենա ու համալսարան գնա-գա: Ես պետք է առաջին կիսամյակի վճարը մուծեմ, որ թույլատրեն ուսումը շարունակելու: Վճարը 350 հազար դրամ, եթե էսօրվանից իմ 35 հազար դրամ աշխատավարձը հավաքեմ, էլի չի կարողանա տղաս սովորել, չեմ հասցնի», -ներկայացրեց տիկինը:
Aravot.am-ը հետաքրքրվեց, եթե Սերժ Սարգսյանը իր խնդրանքին չընդառաջի, լրագրողի կինը կգնա ու նրան կընտրի՞: « Եթե չվճարեն, ուրեմն էրեխեն դուրս կմնա, ես էդ մտքի հետ ի՞նչ ձևով հաշտվեմ, որ գաղափարապես զարգացած երեխան մնա տունը: Բա ի՞նչ պիտի անեմ, ես էս իշխանության անդամ եմ, սա բողոք չէ, իմ խնդրանքս է իմ նախագահիս: Գոնե ես էլ ինձ մի քիչ ապահովված զգամ, 35 հազար դրամով հոգուդ մեռնիմ ինչպե՞ս ապրիմ: Էնքանով գոհ եմ, որ աշխատատեղ ունեմ: Պրեզիդենտի ամեն այցին ներկա եմ գտնվել, բոլորին ճանաչում եմ, ես ցանկանում եմ, որ մեր ընտրությունները անցնեն առողջ, անփորձանք, անվնաս: Թող Աստված ամեն մարդու սրտով իրան տա, մի քիչ էլ մեր իշխանությունները խղճի դռները բացեն. մեզ պես չքավորներին օգնության հասնեն: Հույս ունենամ, որ իմ խնդրանք- աղաչանք-պաղատանքս կհասնի մեր պրեզիդենտին», -ասաց ՀՀԿ-ական տիկինը, որին շարքային կուսակցական լինելու համար չէին հրավիրել Արթիկի մշակույթի տուն նախագահի հետ հանդիպման: Հրավիրված էին միայն գյուղապետերը ու արթիկցի պաշտոնյաները:
Նունե ԱՐԵՎՇԱՏՅԱՆ
Կարդացեք նաև
