Հայաստանի նախագահի 2013թ. ընտրությանը հետևող ԵԱՀԿ/ԺՀՄԻԳ դիտորդական առաքելությունը հրապարակել է ընտրական վերջնական զեկույցը:
Ընտրարշավի և քարոզարշավի ֆինանսավորման մասով զեկույցում ասվում է, որ թեև ընտրական օրենսգիրքը հավասար հնարավորություններ է սահմանում բոլոր թեկնածուների համար, սակայն քարոզարշավի որոշ կանոնակարգերը և դրանց իրականացումը ցույց տվեցին, որ վարչական ռեսուրսների չարաշահման դեպքերը բավարար չափով պաշտպանված չեն:
Հիմնարար ազատությունները ընդհանուր առմամբ հարգված էին, և բոլոր մրցակիցները քարոզարշավն իրականացրին առանց արգելքների, սակայն հօգուտ գործող նախագահի ԵԱՀԿ/ԺՀՄԻԳ դիտորդները նկատել են պետական կառավարման և վարչական ռեսուրսների չարաշահում:
Բոլոր թեկնածուները գրանցումից հետո ներկայացրել էին իրենց եկամուտների հայտարարագրերը և ակտիվները, բայց ԿԸՀ վերահսկիչ-վերստուգիչ ծառայությունը իրավասություն չունի հրապարակված տվյալների արժանահավատությունը գնահատելու: Արման Մելիքյանը քարոզարշավի հաշիվ չի բացել և չի ներկայացրել ֆինանսական հայտարարագրերը, բայց չի պատժվել, քանի որ նման դեպքի համար պատիժ սահմանված չէ:
Կարդացեք նաև
Հետընտրական զարգացումների մասով զեկույցում ասվում է, որ հիմնական հեռարձակողները, այդ թվում «Հ1»-ը, ընտրողական մոտեցում եմ ցուցաբերել հետընտրական իրադարձությունները լուսաբանելիս` ընտրությունների անցկացման վերաբերյալ քննադատությունը սահմանափակելու նկատելի միտումով: ԵԱՀԿ/ԺՀՄԻԳ դիտորդական առաքելության ուսումնասիրած բոլոր լրատվամիջոցները լուսաբանել են Րաֆֆի Հովհաննիսյանի կազմակերպած հավաքները և ցույցերը, սակայն հիմնական հեռուստաալիքները տրամադրում էին միայն ընդհանուր լրատվություն, իսկ երբեմն բողոքի ցույցերի մակերեսային և մարգինալ լուսաբանում: «Արմենիա» հեռուստաալիքը բողոքի ցույցերը ներկայացնում էր կողմնակալ և բացասական պատկերով: Միևնույն ժամանակ, այս հեռուստաալիքները հաճախակի կրկնում էին ոստիկանության հայտարարությունը, որ ցույցերը լիազորված չեն:
Պատրաստեց Հովհաննես ԻՇԽԱՆՅԱՆԸ
