Ճանաչված մարդիկ՝ «չճանաչված» Արցախ այցելողների ու ադրբեջանական հիստերիայի մասին
Ադրբեջանի մեջլիսն ու արտգործնախարարությունը ժամանակ առ ժամանակ Արցախ այցելող այս կամ այն պետական, քաղաքական, մշակութային գործչին հայտարարում են persona non grata: Արդյոք իրավաչա՞փ է նման պատժաձեւը, եթե տվյալ անձը չի ծավալել գործունեություն ընդդեմ Ադրբեջան պետության:
ԱԺ պատգամավոր Հովհաննես Սահակյանն այս առիթով «Առավոտին» ասաց, թե ադրբեջանցիների այդ քայլը դիվանագիտական անճարակության ցցուն օրինակ է. «Ես կարծում եմ, որ ադրբեջանցիները հյուրընկալության եւ այլ հարցերում պետք է օրինակ վերցնեն ԼՂՀ իշխանություններից: Թե չէ, որ այսպես շարունակվի, Ադրբեջան կայցելեն միայն ադրբեջանցիները»:
Բեմադրիչ Ալեքսանդր Գրիգորյանի խոսքը հակիրճ էր. «Ադրբեջանցիների որոշումը քաղաքական խուլիգանության օրինակ է»:
Կարդացեք նաև
ԱԺ պատգամավոր Շուշան Պետրոսյանի ձեւակերպմամբ. «Այդ քայլով ադրբեջանցիներն աշխարհին ապացուցում են իրենց տգիտությունը: Դա մի երեւույթ է, որն իսկապես գրոտեսկ է: Օրերս եմ վերադարձել Արցախից, որտեղ հյուրընկալվել էր օպերային մեգաաստղ Մոնսերատ Կաբալիեն: Պետք էր տեսնել, թե աշխարհահռչակ երգչուհին ի՜նչ հիացմունքով խոսեց Արցախ աշխարհի, արցախցու մասին: Մինչեւ հիմա ականջիս հնչում է Կաբալիեի մեկնաբանմամբ Կոմիտասի «Կռունկը»…»:
Նկարիչ Ռոբերտ Էլիբեկյանը զավեշտ անվանելով ադրբեջանցիների նման վերաբերմունքը, նկատեց. «Դա նույնն է, թե մեկն ինձ արգելի գնալ մի տեղ հյուր…»:
Կինոռեժիսոր, «Ոսկե ծիրան» կինոփառատոնի հիմնադիր Հարություն Խաչատրյանն էլ այս կարծիքի է. «Դա թույլ մարդու կողմից մտածված պատժաձեւ է: Օրինակ՝ «Ոսկե ծիրան» փառատոնին հայտ է ներկայացրել ադրբեջանցի կինոռեժիսոր, որի նկարած կարճամետրաժ խաղարկային ֆիլմը պատմում է Ադրբեջանի մասին: Հիմա մենք ի՞նչ անենք, արգելե՞նք… Ընդ որում՝ ադրբեջանցի արվեստագետը հայաստանյան փառատոնին հայտը ներկայացրել է Գերմանիայից: Այ այստեղ կարող ենք մտածել՝ գուցե վախեցե՞լ է ներկայանալ իր հայրենիքից…»:
ԱԺ պատգամավոր Դավիթ Հարությունյանը հայտնեց, որ persona non grada-ն քաղաքական կատեգորիա է, այլ ոչ իրավական. «Համոզված եմ, որ ադրբեջանցիների այդ որոշումը քաղաքակիրթ աշխարհի համար անընդունելի է, իսկ խոսել դրա իրավաչափության մասին՝ անիմաստ է»:
Կոմպոզիտոր Ռոբերտ Ամիրխանյանն այս հարցի շուրջ բազմաթիվ կարծիքներ է լսել ու զարմացել. «Դրանք մի պարզ ճշմարտությո՞ւն էլ չեն կարողանում հասկանալ, որ ուրիշի տան հյուրերին կոնտրոլ չի կարելի անել»:
«Էդ այլանդակ ցեղին ի՞նչ ասես… Ախր մյուս կողմից էլ կարծում եմ՝ աշխարհը շատ բան չի իմանում: Օրինակ՝ ինչու չի շահագործվում Ստեփանակերտի օդանավակայանը: Տեղին է հիշել մեծն Նժդեհի խոսքերը՝ «ուժն է ծնում օրենքը»: Կարծում եմ, որ մեր քաղաքական գործիչները, իշխանությունները չպետք է լռեն: Երազում եմ, որ մեր նախագահը հեռուստատեսությամբ ելույթ ունենա, եթե դրա հարկն էլ կա՝ բռունցքը սեղանին խփելով մեզ ու աշխարհին դրանց հետ կապված (նկատի ունի ադրբեջանցիներին – Ս.Դ.) վերջնական պարզաբանումներ տա»,- զայրանում է քանդակագործ Լեւոն Թոքմաջյանը:
ԱԺ պատգամավոր Մնացական Մնացականյանը հայտնեց. «Ինչպես ուրիշ շատ հարցերում, այս դեպքում էլ Ադրբեջանն աշխատում է ժամանակին դեմ: Արցախ այցելած նշանավոր գործիչներին «անցանկալի անձ» հայտարարելու դեպքում չեն հասկանում մի պարզ ճշմարտություն, որ այդ նույն՝ իրենց համար անցանկալի դարձածները միայն պատիվ կբերեին հենց իրենց»:
Բեմադրիչ Ռուբեն Բաբայանը կարծում է. «Երբեմն որոշումները լինում են նաեւ հիմար, իսկ դրանք մեկնաբանության կարիք չունեն»:
ՍԱՄՎԵԼ ԴԱՆԻԵԼՅԱՆ
«Առավոտ» օրաթերթ
