Կապանում գործող հասարակական տրանսպորտի ուղեվարձը չի թանկանալու: Այս մասին այսօր Aravot.am-ին փոխանցեց Կապանի քաղաքապետարանի կոմունալ բաժնի փողոցային լուսավորության եւ ճանապարհատրանսպորտային ծառայության բաժնի պետ Աշոտ Ոսկանյանը: «Ո՛չ նման հայտ են ներկայացրել, ո՛չ էլ մենք թույլ կտանք ուղեվարձի թանկացում տեղի ունենա»,- նշեց պարոն Ոսկանյանը:
Փաստորեն Կապանը Երեւանի օրինակին չի հետեւի եւ դժգոհությունների ալիք չի բարձրանա մարզկենտրոնում, համենայնդեպս, մոտ ժամանակներս: Կապանում գործող 5 երթուղային գծերը սպասարկող միկրոավտոբուսների ուղեվարձերը շարունակելու են 100 դրամ մնալ: Իսկ Կապան-Վաչագան երթուղային գիծը սպասարկող միկրոավտոբուսի ուղեվարձը՝ 150 դրամ: Միկրոավտոբուսների ուղեվարձը 100 դրամ էր դարձել դեռեւս մոտ մեկ տարի առաջ, ինչից շատ կապանցիներ դժգոհ էին՝ գտնելով, որ մայրաքաղաքի համեմատ Կապանի համար ուղեվարձի գինը թանկ է: Աշոտ Ոսկանյանի խոսքով՝ մոտ մեկ տարի առաջ հայտ ներկայացրել էր միայն մեկ ընկերություն, որն առաջարկել էր հին մեքենաները փոխարինել նոր մեքենաներով եւ բարելավել սպասարկումը, ինչով էլ պայմանավորված էր սակագնի թանկացումը:
Իսկ ավտոբուսների ուղեվարձերի թանկացում տեղի չի ունեցել այն ժամանակ, ներկայումս էլ սակագնի բարձրացում չի նախատեսվում: Կապանի համար 6 եւ համար 8 ավտոբուսները շարունակելու են սպասարկել 50 դրամ ուղեվարձով:
Իսկ Կապան-Կավարտ երթուղին սպասարկող համար 1 ավտոբուսի ուղեվարձը 100 դրամ է՝ հաշվի առնելով հեռավորությունն ու ճանապարհների անմխիթար լինելու հանգամանքը: Կապանցիները ուղեվարձի սակագնի կտրուկ փոփոխություններ չեն նկատել նաեւ տաքսի ծառայություններից օգտվելիս:
Կապանում գործող «Դիո» եւ «Կապան» տաքսի ծառայությունների ուղեվարձի նվազագույն սակագինը 500 դրամ է: «Կապան» տաքսին 500 դրամ սահմանել է 1-4 կմ-ի համար, իսկ «Դիո»-ն՝ 1-5 կմ:
Մերի ՍՈՂՈՄՈՆՅԱՆ
