«Մեկը սկսելու է ստվերում աշխատել, մեկը իր բիզնեսը գրանցելու է դրսում, այսինքն` հարկային մուտքերը պակասելու են եւ կառավարությունը վաղ թե ուշ հասկանալու է, որ սխալ օրենք է ընդունել»,- այսպիսի համոզմունք հայտնեցին «Ընդդեմ պարտադիր կուտակային կենսաթոշակային համակարգի» քաղաքացիական նախաձեռնության անդամները:
Այսօր «Ելակետ» ակումբում նախաձեռնության անդամ Դավիթ Մանուկյանը հանրությանը կոչ արեց չընտրել ֆոնդեր եւ ֆոնդերի կառավարիչներ: Նրանց խոսքերով, Սահմանադրական դատարանը, որն այս օրերին քննում է մի խումբ քաղաքացիների դիմում-բողոքը` կենսաթոշակային օրենքը հակասահմանադրական ճանաչելու վերաբերյալ, դեռ վերջնական ատյան չէ եւ խմբի անդամները անբավարար պատասխան ստանալու դեպքում դիմելու են միջազգային դատարաններ:
Իրենց պահանջները չբավարարելու դեպքում երիտասարդները խոստացան քաղաքացիական անհնազանդություն` «Փողոցներ կփակենք, երթեր կկազմակերպենք»:
Նրանք կոչ արեցին քաղաքացիներին միանալ հունվարի 18-ին կայանալիք երթ-հավաքին, որի ընթացքում կներկայացվեն համակարգի բացասական հետեւանքները:
Կարդացեք նաև
Ըստ նրանց, ՀՀ նախագահ Սերժ Սարգսյանին ուղղված դիմումը նույնիսկ նախագահի կողմից չի ուսումնասիրվել եւ միանգամից ուղարկվել է աշխատանքի եւ սոցիալական հարցերի նախարարություն, մինչդեռ այդ դիմումում երիտասարդները մի շարք լուրջ մտահոգություններ են հայտնել, համակարգի տապալման եւ հետագայում երկրի`տնտեսական լուրջ խնդիրների առաջ կանգնելու մասով: Երիտասարդները պատրաստ են անգամ մեկ-երկու օրով գործադուլ անելու:
Հարցին, թե այսօր մի շարք գործատուներ բարձրացրել են իրենց աշխատողների աշխատավարձերը, որպեսզի կենսաթոշակի բեռը չմնա աշխատողի վրա, Դավիթ Մանուկյանն ասաց, որ հարցը այդ գումարները չեն եւ որ խնդիրն ավելի խորն է:
Լուսինե ԲՈՒԴԱՂՅԱՆ
