«Տնտեսագիտությունից մի փոքր հասկացող մարդիկ գիտեն, որ Մաքսային Միության մասին խոսելը ապուշություն է, երբ Ռուսաստանի վարչապետն ասում է՝ «Մենք տնտեսություն չունենք, ունենք միայն գազ ու նավթ»: Եթե Ռուսաստանի վարչապետն ասում է, որ տնտեսություն չունեն՝ այդպիսի կողմնորոշում ունեցող մարդն ձախողման է դատապարտված»,- այսօր՝ հունվարի 25-ին, լրագրողների հետ հանդիպման ժամանակ հայտարարեց ԱԻՄ առաջնորդ Պարույր Հայրիկյանը:
Պարոն Հայրիկյանի խոսքով ոչ մի հայ Փարիզ գնալու փոխարեն չի գնա Սանկտ Պետերբուրգ, Հռոմ գնալու փոխարեն չի գնա Մոսկվա, այսինքն՝ Եվրոպայի փոխարեն չի ընտրի Ռուսաստանի տափաստանները:
Պարույր Հայրիկյանը նշեց նաեւ՝ եթե պատերազմ սկսվի, եւ նրան մասնակցի Հայաստանի դաշնակից Ռուսաստանը, ակամայից աշխարհը սկսելու է համակրել Ադրբեջանին.
«Ա՜խ, այդ այն ռուսները չե՞ն, որ Վրաստանն էին գրավում, այդ այն ռուսները չե՞ն, որ Եվրոպան էին ուզում տիրել, ուրեմն՝ այդ ռուսները ձեզ են պաշտպանում, խեղճ ադրբեջանցինե՛ր»:
Կարդացեք նաև
Իսկ այն հարցին, թե ինչպես է պարոն Հայրիկյանը վերաբերվում նախագահ Սերժ Սարգսյանի արձագանքին Քոչարյան-Սարգսյան բանավեճին, Պարույր Հայրիկյանը պատասխանեց, որ տեղյակ է, որ Հայաստանի երկրորդ եւ երրորդ նախագահներն ընկերներ են եղել.
«Բայց ընկերներն այլ բան են, թիմը՝ այլ բան: Այս պահին Տիգրան Սարգսյանը Սերժ Սարգսյանի թիմից է, եթե իր թիմակցին արժանի հովանավորության չարժանացնի, թիմի մյուս անդամների մոտ կասկած կարող է առաջացնել: Եւ այդ պատճառով՝ Սերժ Սարգսյանն այս պահին դատապարտված է պաշտպանել իր թիմի բոլոր անդամներին»:
Ամի Չիչակյան
