Պատմամշակութային արժեք ունեցող Հրաչյա Աճառյանի անվան դպրոցի շենքի ճակատամասի քանդման կապակցությամբ ՍիվիլՆեթը հարցում էր ուղարկել Երևանի քաղաքապետարան` պարզելու, թե ինչ պայմաններում են իրականացվել քանդումը և արդյոք կա համապատասխան թույլտվություն` քանդման աշխատանքներ իրականացնելու համար:
Հարցմանը ի պատասխան` Երևանի գլխավոր ճարտարապետի աշխատակազմից պատասխանել են. «Կառավարության N917-Ա առ 29.08.2017թ. որոշման համաձայն` Երևանի Հերացու փողոցի հ. 2 հասցեում գտնվող շենքը (նախկին Հ. Աճառյանի անվան թիվ 72 դպրոց) տրամադրվել է «Հավաքական անվտանգության պայմանագրի կազմակերպության ակադեմիա» հիմնադրամին՝ այն որպես ակադեմիա վերակառուցելու նպատակով։
«Երևաննախագիծ» ՓԲԸ-ի կողմից մշակվել է նշված շենքի վերակառուցման և տարածքի բարեկարգման նախագիծ, որով ապահովվել են մշակույթի նախարարության հ 03/14.1/1145-14 առ 27.03.2014թ. գրությամբ և Երևանի քաղաքապետարանի կողմից տրամադրված ճարտարապետահատակագծային առաջադրանքով առաջադրված պահանջները, այդ թվում` հուշարձան–շենքի ուսումնասիրում և վավերագրում։
Ապրիլի 10-ին` ժամը 19:00-ի մոտակայքում, շինարարական աշխատանքների իրականացման ընթացքում գլխավոր ճակատի որոշ հատված և կողաճակատային պահպանված պատերից ձախակողմյանը ամբողջությամբ փլվել են։ Ստեղծված մասնագիտական հանձնաժողովի կողմից տեղում կատարվել է համապատասխան ուսումնասիրություն և հետազոտություն, որի արդյունքում եզրակացություն է ներկայացվել, որ նկատի ունենալով շենքի տեխնիկական վիճակի բացահայտված թերությունները` տեխնիկապես անընդունելի, անհնար և վտանգավոր է դառնում պատի հետագա պահպանումը և ուժեղացումը։
Առաջարկվել է գլխավոր ճակատային պատը հատուկ մշակված նախագծով քանդել, պիտանի քարերը պահեստավորել և նույն ճարտարապետական նկարվածքով վերականգնել՝ այն իրականացնելով սահմանված կարգի և գործող նորմերի բոլոր պահանջների կատարմամբ։
Կարդացեք նաև
Իսկ ապրիլի 29-ին տեղի ունեցած ճակատի վերջնական փլուզմանը նպաստեցին հորդառատ անձրևները և շինարարական աշխատանքների ոչ պատշաճ կազմակերպումը։
Նյութի մանրամասները կարդացեք սկզբնաղբյուր կայքում
