Այսօր «Տոնուս» շինարարական կազմակերպությունից քաշված մի խումբ քաղաքացիներ կառավարության շենքի առաջ՝ փոքր երեխաներին գրկած, բողոքի ակցիա էին անում: Նրանց խոսքերով, դեռեւս 2008 թվականին պետք է ստանային իրենց բնակարանները, սակայն մինչ օրս փողոցներում են: «Տոնուսի» բնակիչներին պատկանող շենքը, որը կիսակառույց վիճակում գտնվում է Դավիթաշենում, որպես գրավ հայտնվել է «Արցախ բանկի» ձեռքին, շինարարական կազմակերպությունն էլ սնանկ է ճանաչվել:
Aravot.am-ի հետ զրույցում «Տոնուս»-ից տուժած բնակիչներն ասացին, որ ներկայումս 150 ընտանիք, որոնք պետք է տուն ստանային այս շինարարական կազմակերպությունից, ֆինանսական եւ բարոյական վնասներ են կրել, քանի որ բացի այն, որ ապրում են վարձով, տուն չունեն, հազարավոր դոլարներ էլ կորցրել են: Գումարը տվել են շինկազմակերպությանը եւ մի օր պարզել, որ խաբված վիճակում են:
«Կառավարությունն ուղարկում է «Արցախ բանկ», բանկն էլ ասում է`շենքը գրավ է եւ մեզ է պատկանում, քանի որ ընկերությունը շենքը կառուցելու դիմաց գումարներ է վերցրել»,-ասում են բնակիչները:
Նրանք պահանջում էին վարչապետ Հովիկ Աբրահամյանին, որն այդպես էլ չիջավ: Փոխարենը՝ բնակիչների բողոքը վերցրեց կառավարության նամակների բաժնի ներկայացուցիչը` հավաստիացնելով, որ կփոխանցի վարչապետին:
Լուսինե ԲՈՒԴԱՂՅԱՆ
