Քիչ առաջ կառավարության շենքի մոտից դեպի ոստիկանության շենք շարժվող ցուցարարներին ԱԱԾ շենքի մոտ դիմավորեց ՀՀ փոխոստիկանապետ Վալերի Օսիկյանը: Նա պահանջում էր, որպեսզի երթի մասնակիցները քայլեն ձախ մայթով, քանի որ եւ ԱԱԾ-ն եւ ոստիկանությունը գտնվում են հատուկ պահանվող օբյեկտների ցանկում, ուստի պատշաճ հեռավորությամբ պիտի ակցիաներ իրականացվեն: Ցուցարարները ըմբոստացան, չէին ցանկանում ենթարկվել ոստիկանության պահանջներին, սակայն ԲՀԿ-ական պատգամավորներ Նաիրա Զոհրաբյանի ու Էլինար Վարդանյանի, Վահե Էնֆիաջյանի ու Վահան Բաբայանի հետ բանակցությունների արդյունքում պատգամավորները ցուցարարներին հորդորեցին անցնել դիմացի մայթ, քանզի հավաքի նպատակը բախումներն ու ծեծուջարդերը չեն, այլ խաղաղ արդարացի պահանջի ներկայացումը:
Այս պահին ցուցարարներն արդեն ոստիկանության շենքի դիմաց են: Իր ելույթում Նաիրա Զոհրաբյանը ասաց, որ պահանջում են, որպեսզի Արտակ Խաչատրյանի ծեծի հանգամանքները բացահայտվեն հաշված օրերի ընթացքում եւ մեղավորները պատասխանատվության ենթարկվեն: Տիկին Զոհրաբյանը նշեց, որ հակառակ դեպքում իրենք «բազմաթիվ պաշտոնյաների» հրաժարականները կպահանջեն ու հստակեցրեց, որ խոսքը գնում է կոնկրետ իշխանափոխության պահանջի մասին, ոչ թե մի քանի չինովնիկների հրաժարականի:
Ցուցարարները վանկարկում են՝ «Արդարություն»:
Կարդացեք նաև
Նելլի ԳՐԻԳՈՐՅԱՆ
