Հարցազրույց ՀՀԿ պատգամավոր Ռուզաննա Մուրադյանի հետ
– Որոշ վերլուծություններով, այն, ինչ որ կատարվեց վերջերս քաղաքական դաշտում` ԲՀԿ-ՀՀԿ հարթությունում, ինչի արդյունքում ԲՀԿ նախագահ Գագիկ Ծառուկյանը հեռացավ քաղաքականությունից, կդառնա արտագաղթի հերթական ալիքի պատճառ:
– Ժողովրդավարության կայացման ճանապարհին քաղաքական ուժերի վերադասավորումները քաղաքական դաշտում բնականոն գործընթացներ են: Ստեղծված իրավիճակը պետք է գնահատել ոչ թե որպես ինչ-որ բանի ավարտ, այլ ընդհակառակը՝ քաղաքական վերադասավորումների միջոցով նոր սկիզբ դրվեց քաղաքական դաշտի կայունացման և հետագա զարգացման համար:
– Ի դեպ, արդեն իսկ դժգոհություններ են հնչում, որ Գագիկ Ծառուկյանի` քաղաքականությունից հեռանալու արդյունքում կրճատած բարեգործական ծրագրերը, չասենք էական, բայց ազդեցություն ունենում են որոշակի խավերի վրա:
Կարդացեք նաև
– Գագիկ Ծառուկյանը բացի քաղաքական գործիչ լինելուց՝ նաև բարեգործ է: Առաջինից դուրս գալուց հետո, մեկը մյուսի հետ պետք է որ կապ չունենա: Եթե բարեգործությունն արվում է հանուն քաղաքականության, ապա դա չի կարող արդեն բարեգործություն համարվել: Սա ևս մեկ ցուցանիշ է հասկանալու, որ նա, ով իսկապես կամենում է անել բարեգործություն, արդարացում չի փնտրի այն չանելու համար:
– ԲՀԿ-ն վերջապես կողմնորոշվեց եւ իրեն հռչակեց ընդդիմություն: Ընդդիմադիր ԲՀԿ-ն Է՞ ՀՀԿ-ի համար ավելի վտանգավոր, թե՞ այլընտրանքն էր:
-Ընդհանրապես քաղաքականության մեջ ավելի գնահատելի են կողմնորոշված դիրքորոշումները:Երբ կա ուժեղ և կառուցողական ընդդիմություն, և ընդդիմադիր դաշտը կոնկրետ դերակատարներ ունի, իշխանությունը գործում է ավելի հստակ և տեսանելի:
-Իշխանությունը` նախագահը, հստակ հայտարարեց, որ հետ չի կանգնելու սահմանադրական բարեփոխումների գաղափարից: Հայաստանում շատ խնդիրներ կան, որոնք Սահմանադրությամբ պայմանավորված չեն: Կառավարման համակարգի փոփոխությանն էլ, նախագահը վերահաստատեց, որ այդքան էլ կողմ չէ: Հետեւաբար ո՞րն է պատճառն այս իրավիճակում ամեն գնով սահմանադրական փոփոխություններ իրականացնելու: Ընդամենը եվրոպական համայնքին հաճոյանա՞լը:
– Կարծում եմ, որ արդեն հասունացել է պահը, և անհրաժեշտություն է առաջացել կառավարման ավելի ժողովրդավարական մոդելի ներդաշնակ համատեղմանը պետության անվտանգության և կայունության հետ: Ակնհայտ է, որ սահմանադրական բարեփոխումների գլխավոր նպատակը դա անցումն է երկրի՝ խորհրդարանական կառավարման մոդելի, որի արդյունքում նոր հնարավորություններ կստեղծվեն Հայաստանի հետագա ժողովրդավարական զարգացման համար:
-Ի դեպ, նախագահի մոտ քաղաքական ուժերի հանդիպումները շատ քննարկվեցին, քննադատվեցին, այդ ընդդիմադիրներին Բաղրամյան 26-ի հաճախորդներ անվանեցին: Ընդդիմադիրների` միմյանց նսեմացնելու գործընթացին ինչպե՞ս եք վերաբերվում, իշխանությունը դրանից հաճո՞ւյք է ստանում:
-Երկրի նախագահ Սերժ Սարգսյանը սահմանադրական փոփոխությունների շուրջ առանձին հանդիպումներ ունեցավ քաղաքական ուժերի հետ, կազմակերպեց բաց քննարկումներ, պատրաստակամություն է հայտնեց քննարկելու բոլորի կողմից արված առաջարկները: Դիմադիր, թե ընդդիմադիր դաշտում քաղաքական գործիչներին անտեղի նսեմացնելու, վարկաբեկելու փորձերը դատապարտված են ձախողման, քանի որ քաղաքական ուժերի մասնագիտական կարծիքները և առաջարկները արտահայտելու հնարավորությունը նրանց միջև համագործակցության արդյունավետ ձևաչափ է: Իսկ երկրի նախագահի կողմից քաղաքական ուժերի հետ երկխոսությունների հնարավորության ստեղծումը ժողովրդավար կառավարման լավագույն օրինակ է, որը պետք է կարողանալ ճիշտ ընկալել և արժևորել:
Նելլի ԳՐԻԳՈՐՅԱՆ
