Հանրային կառավարման համակարգի աջակցության կարիքների գնահատում իրականացնելու նպատակով ՀՀ քաղաքացիական ծառայության խորհրդում էր գտնվում «Մասնակցային ժողովրդավարություն, բաց կառավարում և արդյունավետ էլ-կառավարման ծառայություններ» (PADOS) ծրագրի փաստահավաք խումբը` ի դեմս Հանրային կառավարման ֆիննական դպրոցի (HAUS) վերապատրաստման ծրագրերի համակարգող Ռեյո Լինդի և Էստոնիայի էլ. կառավարման ակադեմիայի ավագ փորձագետ Իվար Տալլոյի:
Հունիսի 25-ին և 26-ին կայացած հանդիպումների ընթացքում փորձագետներին են ներկայացվել Հայաստանում հանրային կառավարման կառուցվածքը, օրենսդրությունը, քաղաքացիական ծառայության համակարգում առկա խնդիրները, զարգացման հեռանկարներն ու նախատեսվող բարեփոխումները, կոռուպցիոն ռիսկերի նվազեցման և բաց կառավարման կառուցակարգերը, էթիկայի և շահերի բախման ինստիտուտների ներդրման միտումները: Քննարկվել են այս հարցերում PADOS ծրագրի կողմից հնարավոր աջակցության ուղղությունները: Նախատեսվում է այս տարվա աշնանը ծրագրի շրջանակներում Երևանում անցկացնել ընդլայնված աշխատաժողով` ներկայացնելու համար ներկայումս իրականացվող գրահատման արդյունքները, դրանց հիման վրա PADOS-ի կողմից ներկայացվելիք առաջարկությունները:
Ընդունելով փաստահավաք խմբին` ՀՀ ՔԾԽ նախագահ Մանվել Բադալյանը նշել է, որ քաղաքացիական ծառայության համալրման, էթիկայի և շահերի բախման ինստիտուտների կայացման և վերապատրաստման կարիքների բացահայտման մեխանիզմների կատարելագործումն այն հիմնական առաջնահերթություններն են, որտեղ առավել նպատակային կլինի ծրագրի հետ համագործակցությունը:
PADOS ծրագրի հիմնական նպատակն է ուժեղացնել Արևելյան գործընկերության երկրներում որոշումների կայացման և կառավարման թափանցիկությունը` նպաստելով ժողովրդավարական կառավարմանը, աջակցելով ԱրԳ երկրների ինստիտուցիոնալ կարողությունների և հանրային կառավարման զարգացմանը:
Ծրագիրն ունի երեք բաղադրիչ: 1-ին` մասնակցություն, էլեկտրոնային ժողովրդավարություն և բաց կառավարում, 2-րդ` էլեկտրոնային կառավարում, տեղեկատվական (կիբեր) անվտանգություն և տվյալների պաշտպանություն, 3-րդ` հանրային կառավարման բարեփոխումներ և բարդ իրավիճակներում ղեկավարման նոր մոտեցումներ:
Մեկ տարի տևողությամբ այս ծրագիրն իրականացում է Հանրային կառավարման ֆիննական ինստիտուտը` էստոնական գործընկերների (Էստոնիայի դիվանագիտական դպրոց, Էլ-կառավարման ակադեմիա, Հանրային ծառայության վերապատրաստումների և զարգացման կենտրոն) հետ մեկտեղ:
Գ. Աբռահամյան
Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն
Ք Ա Ղ Ա Ք Ա Ց Ի Ա Կ Ա Ն Ծ Ա Ռ Ա Յ ՈՒ Թ Յ Ա Ն Խ Ո Ր Հ ՈՒ ՐԴ
