Հուլիսի 15-ին ՀՀ սփյուռքի նախարարի տեղակալ Վահագն Մելիքյանն այցելեց Ստեփան Շահումյանի անվան թիվ 1 դպրոց՝ ծանոթանալու «Արի տուն» ծրագրի մասնակիցների հայոց լեզվի 5-օրյա դասերի ընթացքին:
Դասարանները ձևավորվում են լեզվական իմացության մակարդակին համապատասխան, որի հիմքում դրված են տարածաշրջանային և օտար լեզվի (որպես հիմնական լեզվի) իմացության առանձնահատկությունները:
«Արի տուն» ծրագրի չորրորդ փուլին մասնակցում է 153 երիտասարդ՝ աշխարհի 10 երկրից՝ ԱՄՆ-ից, Ռուսաստանից, Սիրիայից, Վրաստանից, Ուզբեկստանից, Հորդանանից, Ուկրաինայից, Իրաքից, Նիդեռլանդներից, Իսպանիայից:
Նախարարի տեղակալ Վահագն Մելիքյանը եւ Երևանի քաղաքապետարանի հանրակրթության վարչության պետ Գայանե Սողոմոնյանն այցելեցին դասարաններ, ներկա գտնվեցին դասընթացներին, լսեցին արիտունցիներին ու ծանոթացան նրանց՝ մայրենիի գիտելիքներին:
Կարդացեք նաև
Սուսաննա Աբազյանի դասարանից Դավիթ Ջանամյանը և Վլադիմիր Նադիրովը (Վրաստան) ասմունքեցին Սայաթ-Նովա, իսկ Գայանե Բաբլոյանի դասարանից Լևոն Թադևոսյանն (Ուզբեկստան) իր անկեղծ հիացմունքը հայտնեց Հայրենիքի, նրա տեսարժան վայրերի մասին, խոստացավ, որ պիտի գա ու հաստատվի Հայաստանում:
Արդեն չորս տարի է Ստեփան Շահումյանի անվան թիվ 1 դպրոցը գրկաբաց հյուրընկալում է «Արի տուն» ծրագրի մասնակիցներին, իրականացնում հայոց լեզվի ուսուցման արդյունավետ դասընթացներ, որտեղից արիտունցիները հեռանում են հարստացած հայոց լեզվի, Հայրենիքի, հայոց պատմության ու մշակույթի մասին գիտելիքներով:
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ՍՓՅՈՒՌՔԻ ՆԱԽԱՐԱՐՈՒԹՅՈՒՆ
