Երեւանի մամուլի ակումբն այսօր «Հանրաքվեի լուսաբանումը Հայաստանում» թեմայով քննարկում է կազմակերպել, որին ներկա Եվրոպայի խորհրդի փորձագետ Լորան Ռուին լրագրողները հարց ուղղեցին՝ կրթության եւ գիտության նախարար, ՀՀԿ-ի փոխնախագահ Արմեն Աշոտյանը Հանրային հեռուստատեսությամբ քաղաքական հաղորդում է սկսել վարել սահմանադրական փոփոխությունների նախագծի հանրաքվեի քարոզարշավի ընթացքում:
Միջազգային փորձագետը նախ ճշտեց՝ «Ճի՞շտ եմ հասկանում, դուք ասում եք հանրայի՞ն հեռարձակողի ալիքով հաղորդման մասին եւ որ հաղորդավարը կառավարության ներկայացուցի՞չ է, նա՞ է վարում հաղորդումը»:
Փորձագետն ակնհայտորեն զարմացած էր, եւ երբ համոզվեց, որ ՀՀԿ անդամն ու նախարարն է նման հաղորդում վարում:
Լորան Ռուին էլ ավելի զարմացած պատասխանեց.«Դե ինչ՝ սա հիմնովին սխալ է: Սա բացարձակապես անընդունելի է ընդունված չափանիշների եւ լավագույն փորձի տեսանկյունից: Սա որեւէ կերպ չի կարող համարվել ճիշտ լուսաբանում: Պատկերացրեք ինչպիսի բանավեճ է դա ստացվելու: Ուզում եմ ասել՝ այդ մարդը լուրջ հաղորդո՞ւմ է վարում, դա կատակ չէ՞ »:
Կարդացեք նաև
Նորից հաստատելով, որ լրագրողներն ամենեւին էլ կատակ չեն անում, եւ միանգամայն լուրջ քաղաքական հաղորդում է, փորձագետն ասաց. «Ես պարզապես կարող եմ ասել, որ մտահոգված եմ ձեր հարցից: Դա սխալ է, չի կարելի նման բան անել: Նա չպետք է այդպիսի բան անի: Ոչ»:
Նելլի ԲԱԲԱՅԱՆ