Նորաստեղծ «Օլօլօ» շարժական տիկնիկային թատրոնն այսօր առաջին անգամ փոքրիկ հանդիսատեսի դատին հանձնեց իր առաջին՝ Հովհաննես Թումանյանի «Պոչատ աղվեսը» հեքիաթի հիման վրա բեմադրած նույնանուն ներկայացումը:
«Օլօլօ»-ի հիմնադիրը Մարիաննա Փահլևանյանն է, ով մասնագիտությամբ արթ-թերապևտ է, զբաղվել է նաև տիկնիկաթերապիայով, կարել բազմաթիվ տիկնիկներ, գրել հեքիաթներ: Մարիաննան, փորձելով համադրել այս ամենը, որոշում է հիմնադրել «Օլօլօ» թատրոնը:
Ըստ Մարիաննա Փահլևանյանի՝ «Օլօլօ»-ի գլխավոր առանձնահատկությունն այն է, որ ներկայացումներն ինտերակտիվ են՝ երեխաները ներկայացման ժամանակ հնարավորություն են ունենում ներկայացման մասնակիցը դառնալ, մտնել հեքիաթի մեջ, խաղալ հերոսների հետ, ճանապարհորդել: Թատրոնն ունի շարժական բեմ, ներկայացումները կարճ են՝ 15-20 րոպե, ինչի շնորհիվ երեխաները ձանձրանալու առիթ չեն ունենա:
Կարդացեք նաև
«Օլօլօ»-ի խաղացանկում թատերախումբը զետեղել է ինչպես հայկական, այնպես էլ արտասահմանյան հեքիաթներ:
Մինչև սեփական հասցե ունենալը, «Օլօլօ»-ն իր հանդիսատեսին կհանդիպի պատվիրատուի տանը, այգում, սրճարանում, մանկապարտեզում կամ դպրոցում:
Նունե ՂԱԶԱՐՅԱՆ
