Այսօր ԱԺ-ում Հանրային ծառայությունները կարգավորող հանձնաժողովի 2016-ի տարեկան գործունեության ծրագրի քննարկման ժամանակ ԲՀԿ պատգամավոր Միքայել Մելքումյանը կոշտ քննադատեց կառավարությանը:
Ըստ նրա, այս հանձնաժողովը, ինչպես եւ կառավարությունը ոչ մի բարեփոխում չի ուզում իրականացնի, նման ծրագիր չունի. «Փոքրիկ հրդեհ հանգցնելու ծրագիր եք դրել: Էսօր կառավարությունը չի կարողանում ռեֆորմ իրականացնի, բարեփոխիչի համբավ չունի: Կառավարության չարած գործերը տարածվում են նաեւ ձեր կառույցի վրա: Եկաք ու ասացիք, որ ատոմակայանը կանգնել է 88 օր, պարտքեր են կուտակվել, բա ո՞ւր էր օպերատոր ՓԲԸ-ն, կառավարությունը լուծարել է, ի՞նչ է արել, պետությունն իր վրա չվերցրեց ռիսկերը: Բա ատոմակայանի հետ կապված հարցերը գիտեք թե մոռացա՞նք: Մեքենայություններ կային այնտեղ, ինչեր կային, ԱԱԾ տարան,. Ի՞նչ եղավ դրա հետ կապված: Էդ ո՞նց եղավ, որ ՀԷՑ-ի նոր սեփականատերը եկավ՝ կորուստները 2.5 տոկոսով իջան»:
Միքայել Մելքումյանը հաշվարկ ներկայացրեց, ըստ որի, գազի սակագնի մեջ էլ տարեկան 18 մլն դոլար անհետացել է. «Բա էդ 18 մլն դոլարը որտե՞ղ ա»:
Նա նաեւ նշեց, որ անցյալ կառավարության նիստում օրենքի նախագիծ է ունեցել ազատ տնտեսական գոտում անհատ ձեռնարկատերերին եկամտահարկի արտոնություն տալու. «Բոլոր մարմինները տվել էին դրական, նաեւ էկոնոմիկայի նախարարությունը, միայն ֆինանսների նախարարությունը տվել է բացասական, թե հարկային արտոնություններ չեն նախատեսվում. «Այ ընկեր ջան, որեւէ մեկը քեզ չի ասում Հարկային օրենսգրքով ինչ է նախատեսվում: Ես ակնկալում էի, որ կառավարությունը պետք է խորությամբ նայեր: Սա ի՞նչ պահեր ա, սա ի՞նչ ձեւ ա, էս ի՞նչ ձեւի ա քննարկում կառավարությունը, ի՞նչ մակարդակ ա ցույց տալիս, ես չեմ հասկանում»:
Կարդացեք նաև
Միքայել Մելքումյանը մեղադրեց կառավարությանը, այսպես ասած՝ հեղինակային իրավունք խախտելու, գաղափարներ գողանալու մեջ, որ իրենց նախագծերը մերժում են, ինչ է թե իրենք չեն արել, հետո 2 ամիս հետո նույն նախագիծն իրենց անունից բերում ԱԺ:
Նա ասաց, որ հանձնաժողովի ծրագիրը, որը պետք է ԱԺ-ն ընդունի ի գիտություն, ԲՀԿ-ն չի էլ ընդունում ի գիտություն. «Այս տիպի ծրագիրը ԲՀԿ-ի համար անընդունելի է, չենք էլ ընդունում ի գիտություն»:
ԱԺ փոխխոսնակ Հերմինե Նաղդալյանն էլ կոչ արեց ելույթներում կոռեկտ լինել: Վարդան Այվազյանն էլ հեգնեց, որ նախընտրական տարի է, դրանով են պայմանավորված այս «գունավոր ելույթները»:
Հռիփսիմե ՋԵԲԵՋՅԱՆ
