Այսօր ՀՀ նախկին վարչապետ երջանկահիշատակ Անդրանիկ Մարգարյանի մահվան տարելիցն է: Մեծ քաղաքական գործչի հիշատակը հարգելու համար Կոմիտասի անվան պանթեոն էին այցելել բարձրաստիճան պաշտոնյաներ՝ ՀՀ նախագահ Սերժ Սարգսյանի գլխավորությամբ:
Նավասարդ արքեպիսկոպոս Կճոյանը Անդրանիկ Մարգարյանի շիրիմի մոտ պատարագ մատուցեց: Նրա խոսքերով՝ «Տարին երկու անգամ հավաքվում ենք այստեղ՝ ուխտի զգացողությամբ եւ կերպարի մշտանորոգ ներկայությամբ: Ընդհանրապես անհատականություն ունեցող անձերը, անհատները առաքելության են կոչված: Նրանք կրկնակի ծնունդ են ունենում, մեկը՝ ֆիզիկական, երկրորդը՝ գիտակցական, որը կոչված է առաքելության եւ այն կրում է մեծ պատասխանատվությամբ:
Իրենց մահվանից վերջը, մահվանից հետո այդ հետագիծը ճանապարհ է ուղենշում, որ դառնում է ոգեշնչման, ներշնչանքի ուղեցույց: Այստեղ հավաքվածներից շատերը, նաեւ զինակիցներ եւ ընկերներ, ընտանիքի անդամներ, կրում են այդ առաքելության ուղեգիծը՝ վեր պահելով Անդրանիկ Մարգարյանի խորունկ կերպարի հիշատակությունը:
Այդպիսի անհատներով լցվում է հանրությունը, որը նույնպես անհատների հավաքականություն է, որի մեջ նոսրանում են այն չարի արմատները, որոնցով առլեցուն են դառնում անհատականությունները: Այսօր՝ ավագ ուրբաթ, մենք հավաքվել ենք այստեղ եւս մեկ անգամ խոնարհվելու մեր սիրելի ընկերոջ, բարեկամի, շատերի համար զինակցի, հոր եւ հայրենասերի հիշատակը:
Կարդացեք նաև
Անդրանիկ Մարգարյանը միշտ կմնա որպես այդ մեծ առաքելության ջահակիր եւ իր լույսը կտարածի սերունդների միջոցով, նրա հարազատների միջոցով, նրան հետեւողների միջոցով՝ ամեն տեղ, որտեղ կան գաղափարական մարդիկ, որտեղ կան տեսլական ունեցող մարդիկ, որտեղ կան փնտրող ու գտնող մարդիկ: Այդպիսի մարդիկ միշտ կլինեն հավաքագրված, հավատարմագրված հայրենասիրության ծառայության լուսավոր գործում:
Տա Աստված, որ մենք Դիոգենեսի նման օրը ցերեկով լապտերն առած փորձենք գտնել մարդ արարած՝ մեծատառով: Անհատականությունները տարբերվում են սովորական մարդկանցից հենց նրանով, որ առաքելության ճանապարհի վրա ողջակիզվում են, բայց գլխադիրով, մարդ տառի սկզբնատառն են փորագրում մարդկանց սրտի մատյաններում, հիշողության մեջ: Թող Տերը եւս մեկ անգամ հիշի մեր սիրելի ընկերոջը: Ամեն»:
Սերժ Սարգսյանը եւ մյուս պաշտոնյաները խնկեցին Անդրանիկ Մարգարյանի շիրիմը, ծաղիկներ դրեցին:
Անդրանիկ Մարգարյանի որդին՝ Երեւանի քաղաքապետ Տարոն Մարգարյանը պանթեոնի մուտքի մոտ կանգնած՝ լսում էր այցելուների հիշատակի, ափսոսանքի խոսքերը եւ ճանապարհում նրանց:
Հռիփսիմե ՋԵԲԵՋՅԱՆ
