Ազգային ժողովում մայիսի 20-ին «Ճանապարհային երթեւեկության անվտանգության ապահովման օրենսդրական եւ իրավակիրառ հիմնախնդիրները» թեմայով լսումների ընթացքում տրանսպորտի եւ կապի նախարարի տեղակալ Արամ Արսենյանը նախարարությանը վերապահված գործառույթներից առանձնացրեց տրանսպորտային միջոցների տեխզննությունը:
«Տեխզննությունը մեր նախարարությունում եւ ընդհանրապես մեր հանրապետությունում ինքնանպատակ չէ: Առաջին հերթին՝ մենք Վիեննայի կոնվենցիայի անդամ ենք, որը ստորագրվել է 1968 թվականին, որի անդամներ են 74 երկիր: Մենք այդ կոնվենցիան Սովետական Միության կազմում ենք ստորագրել, որը թարմացրել ենք 2006 թվականին»,- ասաց նա:
Մեջբերելով տրանսպորտային միջոցների տեխզննության կարգը՝ Արամ Արսենյանը նկատեց նաեւ, որ տեխզննությունը որոշ դեպքերում կրում է ձեւական բնույթ, քանի որ տեխնիկական զննության կտրոնը բանկերից ձեռք բերելուց հետո տրանսպորտային միջոցի սեփականատերը կամ տիրապետողը տրանսպորտային միջոցը չի ներկայացնում տեխնիկական զննության: Այսինքն՝ փաստացի չի ստուգվում տրանսպորտային միջոցի տեխնիկական վիճակը, որը իր հերթին բերում է տրանսպորտային միջոցի տեխնիկապես անսարք վիճակում շահագործմանը:
Արամ Արսենյանը ներկայացրեց խնդրի լուծման երկու եղանակ՝ սահմանել վարչական պատասխանատվություն տրանսպորտային միջոցների սեփականատերերի, օգտագործողների կամ տիրապետողների նկատմամբ՝ տրանսպորտային միջոցը առանց տեխնիկական զննության ներկայացնելու եւ շահագործելու համար: Եվ բարձրացնել տեխնիկական զննության կայանների նկատմամբ վերահսկողությունը՝ սահմանելով վարչական պատասխանատվություն օրենսդրությամբ սահմանված կարգով՝ տեխնիկական զննություն չանցկացնելու համար:
Կարդացեք նաև
Ամի ՉԻՉԱԿՅԱՆ
