Այսօր ԱԺ պաշտպանության, ազգային անվտանգության եւ ներքին գործերի մշտական հանձնաժողովը դրական եզրակացություն տվեց «Ազգային անվտանգության մարմիններում ծառայության մասին» Հայաստանի Հանրապետության օրենքում լրացում կատարելու մասին» նախագծի քննարկման հատուկ ընթացակարգի վերաբերյալ ԱԺ-ին առաջարկություն ներկայացնելու մասին հարցին: Այս հարցն այսօր կքննարկվի ԱԺ լիագումար նիստում`24-ժամյա ռեժիմով:
Ըստ այդմ, գեներալ-մայոր եւ գեներալ-լեյտենանտ կոչում ունեցող անձանց ծառայության սահմանային տարիքը`60, հավասարեցվում է գեներալ-գնդապետ կոչում ունեցողների ծառայության տարիքին`65, ԱԱԾ ուսումնական հաստատության դասախոսական կազմինը`10 տարի: Առաջարկվող փոփոխություններով, ԱԱԾ-ում խառայության կարող են անցնել նաեւ ոստիկանության, ԴԱՀԿ-ի, ՔԿՀ-ի, արդարադատության պետական ծառայողները, դատախազներ, ԱԱԾ նախկին ծառայողներ: ԱԱԾ-ի կողմից ներկայացված հիմնավորումներում նաեւ նշված է, որ առաջարկվող փոփոխություններով նաեւ հետախուզական եւ հակահետախուզական ստորաբաժանումների օպերատիվ-հետախուզական գործունեություն իրականացնողների առանձին բացառիկ դեպքերում պաշտոնավարման ժամկետի երկարաձգումը առավելագույնը տասը տարով հնարավորություն կտա նրանց հարուստ փորձը երիտասարդներին փոխանցելու:
Նախագծին դեմ քվեարկեց միայն ընդդիմադիր պատգամավոր Թեւան Պողոսյանը: Նա դեմ է հարցը 24-ժամյա ռեժիմով քվեարկելուն:
Կարդացեք նաև
Aravot.am-ի դիտարկմանը`գուցե հարցը հրատա՞պ է, մանավանդ, ապրիլյան պատերազմն էլ ցույց տվեց, որ ուժային կառույցներում կադրային խնդիրներ ունենք, մեր զրուցակիցը արձագանքեց. «Կադրերի համալրման խնդիրն այսօր չէ, որ ի հայտ է եկել: Վստահ եմ, որ շատ ու շատ երիտասարդ կադրեր կան, որոնք սպասում են իրենց առաջընթացին: Ուրախ կլինեի, որ ավելի շատ զարկ տային դրսում ուսանած, կարդացած երիտասարդներին շրջանակի մեջ ներառելուն, ոչ թե տանել միայն հին կադրերի վրա հենվելուն: Ի վերջո, հին կադրերով էր ստեղծվել ապրիլյան իրավիճակը»:
ԱԺ պաշտպանության, ազգային անվտանգության եւ ներքին գործերի մշտական հանձնաժողովի նախագահ Կորյուն Նահապետյանն էլ ի պատասխան Aravot.am-ի հարցերի`կադրային խնդի՞ր կա, որ հրատապության կարգով է հարցը բերվում, եւ եթե կա խնդիրը, ինչո՞ւ այն հիմա ի հայտ եկավ. ինչո՞ւ ենք երիտասարդ կադրերի առաջընթացի հնարավորությունների փոխարեն հին կադրերի պաշտոնավարման ժամկետներն ավելացնում, պատասխանեց. «ԱԱԾ համակարգում, ընդհանուր առմամբ, կադրային խնդիր չունենք, բայց պետք է նկատի ունենալ, որ համակարգում կան փորձառու կադրեր, որոնց տարիքային շեմը լրանում է, եւ որոշակի ստարաբաժանումների պարագայում պետք է հնարավորություն տալ, որպեսզի նրանք շարունակեն պաշտոնավարել: Դա կատարվելու է բացառիկ դեպքերում, յորաքանչյուր կոնկրետ դեպք քննարկվելու է նշանակելու իրավասություն ունեցող պաշտոնական անձի կողմից`ՀՀ նախագահի եւ ԱԱԾ տնօրենի: Այդ թվաքանակը, կարծում եմ, շատ սահմանափակ է լինելու»:
Կորյուն Նահապետյանը կողմ է համակարգում հավասարակշռված կադրային քաղաքականությանը` փորձառուները պետք է շարունակեն աշխատել, իրենց փորձը երիտասարդներին փոխանցելով:
Նա համամիտ չէ, որ այս փոփոխություններում կոռուպցիոն ռիսկ կա: Ասում է, գործող օրենքը բացառիկ դեպքերում պաշտոնավարման երկարաձգման հնարավորություն տալիս է, փոփոխություններով որոշակի ստորաբաժանումներում կոնկրետ ժամկետների մասին է խոսվում:
Նելլի ԳՐԻԳՈՐՅԱՆ
