Այսօր ԱԺ-ում քաղաքաշինության նախարար Նարեկ Սարգսյանը ներկայացրեց ԱԺ-ում առաջին ընթերցման ժամանակ բավականին մեծ աղմուկ բարձրացրած «Պետական պարգեւների եւ պատվավոր կոչումների մասին» օրենքում լրացում կատարելու մասին նախագիծը:
Նախագծով առաջարկվում է ավելացնել ՀՀ Վաստակավոր շինարարի կոչում: Ըստ նախարարի, հատկապես արդի ժամանակաշրջանում խիստ կարեւորվում է շինարարի աշխատանքը: Հիշեցնենք, որ շատ ընդդիմադիր նաեւ ՀՀԿ-իշխանական պատգամավորներ դեմ էին այս նախագծին՝ ասելով, որ այդ կոչումներից նավթալինի հոտ է գալիս, որ սովետիզմն է վերադառնում եւ այլն:
ԱԺ փոխխոսնակ Էդուարդ Շարմազանովն այսօր արտահերթ ելույթ ունեցավ ու ասաց, որ կոչումներին պետք չի վատ վերաբերվել. «Պետք չի այն, ինչ եղել է խորհրդային շրջանում, ասել, որ դա վատ է: Նախ, կոչումները սովետային շրջանից չեն գալիս, իսկ ցանկացած մասնագիտության քաղաքացի իրեն շատ լավ է զգում եւ կրկնակի պարտավորված է զգում, երբ պետությունն իրեն գնահատում է: Պարզապես գնահատականը պետք է լինի ամբողջական, թե ում ինչ գնահատական ենք տալիս: Նենց չի, որ եթե Արեւմուտքում չկա, մեր մոտ չպետք է լինի: Մենք պետք է կարողանանք մեր լավագույն մասնագետներին, տվյալ դեպքում՝ շինարարներին գնահատել»:
Հռիփսիմե ՋԵԲԵՋՅԱՆ
