Քաղաքագետ Ռուբեն Մեհրաբյանի կարծիքով, այն, ինչ տեղի ունեցավ երեկ ՊՊԾ գնդում՝ հնարավոր ելքերից լավագույնն էր:
«Կարող է թվալ, թե ճգնաժամը հաղթահարված է, բայց՝ ոչ, մենք գործ ունենք քաղաքական ճգնաժամի հետ:
Անցած մեկ շաբաթը ցույց տվեց՝ որեւէ պետական մարմին չի կարող ադեկվատ արձագանք տալ, մենք հասկացանք, որ գործ ունենք ոչ միայն իշխանության, այլեւ ամբողջ քաղաքական դաշտի հետ: Մեր ԱԺ-ն դեռ արձակուրդ է վայելում, մենք ունենք մեռած ԱԺ»,- այսօր «Պոստ սկրիպտում» ակումբում ասաց քաղաքագետը:
Ըստ նրա, Հայաստանում մեռած է քաղաքականությունը, իսկ իրավապահ մարմինը չի կարողանում իր գունդը պահել, բայց. «Ժրաջան կերպով ծեծում է լրագրողներին ու ուղարկում հիվանդանոցներ…Այս ամենը տեղի ունեցավ, քանի որ իշխանությունը փակել է ժողովրդի կամարտահայտության բոլոր օղակները:
Կարդացեք նաև
Ես դեմ եմ ավտոմատով հարցեր լուծելուն, բայց պետք է հասկանալ, թե ինչու այս ամենը տեղի ունեցավ»:
Փաստաբան Լեռնիկ Հովհաննիսյանն էլ կատարվածը բեմադրություն է համարում. «Ինձ թվում է՝ սա պատվեր էր: Ապրիլյան դեպքերից հետո հաշվի չէին առել հայկական ոգին, թե նա ուր կարող է գնալ հանուն ազատության»:
Ըստ նրա, ճիշտ չէ «Սասնա ծռերի» գործողությունները որակել ահաբեկչություն, իսկ բուժաշխատողներին՝ պատանդ. «Պատանդներ գուցե սկզբում կային, բայց նրանց բաց թողեցին, բժիշկների պատանդառության հարցն էլ իշխանության ստեղծած սցենարն է:
Ֆանտազիան մի քիչ շատ է , վերջերս շատ ենք հանդիպում ոստիկանության գրած սցենարով գործողությունների, բայց այս անգամ ֆանտազիան չափից շատ էր:
Ըստ իս՝ այս ամեն ինչը եղել է բեմադրություն, բայց «Սասնա ծռերը» չեն իմացել դրա մասին, դրա մասին նաեւ չգիտեին բարձրաստիճան ոստիկաններ՝ սպանված գնդապետ Վանոյանը, փոխոստիկանապետ Հունան Պողոսյանը»:
Արփինե ՍԻՄՈՆՅԱՆ
Լեռմիկ, քո ֆանտազիան չափ ու սահման չունի,լավ կանես անցնես գիտաֆանտաստիկ գրականության ասպարեզ: